هرات (پژواک، ۶ سلواغه ۱۴۰۳): د هرات حوزوي روغتون مسوولین په دغه ولایت کې د ګازنیونې پېښو له ډېرېدو خبر ورکوي او وایي چې په تېرو دوو میاشتو کې په دغه روغتیایي مرکز کې د ګازنیونې څه باندې ۱۲۰ پېښې ثبت شوې دي.
د هرات حوزوي روغتون سرطبیب ډاکټر فرهاد افضلي پژواک خبري اژانس ته وویل چې په دغه روغتون کې په تېرو دوو میاشتو کې د ګازنیونې ټولې ۱۲۲ پېښې ثبت شوې چې د هغو په پایله کې درې کسان مړه شوي دي.
د هغه په خبره، یادو پېښو کې د مسموم شوو کسانو له ډلې ۶۸ یې ښځې وې چې دغه روغتون ته راوړل شوې دي.
ډاکټر افضلي زیاته کړه چې د ګرمولو له وسایلو، په ځانګړي ډول له ګازي بخاریو ناسمه استفاده د دغو پېښو اصلي لامل ګڼل کېږي.
د یاد روغتون سرطبیب د هرات له اوسېدونکو غوښتنه وکړه څو په ژمي کې د ګرمولو له خوندي وسایلو استفاده وکړي، له ګازي بخاریو د استفادې په صورت کې خونې ته تازه هوا پرېږدئ او له خوندیتوبه یې ځان ډاډمن کړئ.
بلخوا، د هرات د حوزوي روغتون رییس ډاکټر ابراهیم انیس هم د دغو پېښو په منلو سره له هغو خلکو چې په ژمي کې له ګازي بخاریو استفاده کوي، غوښتنه وکړه څو د خپلو خونو ګرمولو لپاره له لازم احتیاطه کار واخلي.
