<p style="text-align: justify;">کابل (پژواک، ۷ سلواغه ۱۴۰۳): د ملګرو ملتونو عمومي سرمنشي نن (د جنورۍ ۲۶مه) د پاکې انرژۍ نړۍوالې ورځې په مناسبت یوه پیغام کې ویلي، تمه ده چې سږ کال نوېکېدونکې انرژي په نړۍ کې د برېښنا د تولید تر ټولو پر سترې سرچینې بدله شي.</p>
<p style="text-align: justify;">نن یکشنبې د سلواغې اوومه (د جنوري ۲۶مه) د پاکې انرژۍ نړۍواله ورځ ده.</p>
<p style="text-align: justify;">د ملګرو ملتونو عمومي سرمنشي انټونیو ګوټریش نن د یادې ورځې په اړه پر خپله<strong><a href="https://x.com/antonioguterres/status/1883318942715764926"> اېکسپاڼه</a> </strong>لیکلي، اټکل کېږي چې سږ کال به نوېکېدونکې انرژي په نړۍ کې د برېښنا د تولید تر ټولو ستره سرچینه شي او زیاته کړې یې ده چې په دې سره لګښتونه هم کمېږي.</p>
<p style="text-align: justify;">نوموړي لیکلي: «د پاکې انرژۍ په دې نړۍواله ورځ راځئ چې د سرعت، عدالت او همکارۍ د پاکې انرژۍ دورې ته ژمن شو.»</p>
<p style="text-align: justify;">د جنوري ۲۶مه د نوېکېدونکې انرژۍ نړۍوالې ورځې (International Day of Renewable Energy) څخه موخه د نوېکېدونکې انرژۍ اهمیت ته پاملرنه او د پراختیا لپاره یې د خلکو د عامه پوهاوي لوړول دي.</p>
<p style="text-align: justify;">نوېکېدونکې انرژي له لمر، باد، اوبو او د ځمکې له تودوخې لاس ته راځي چې د چاپېریال د خرابېدو او د اقلیمي بدلونونو مخنیوي برخه کې مهم رول لري.</p>
