د ماینونو او ناچاودو توکو خطرونو په اړه د عامه پوهاوي برخه کې هوکړه‌لیک لاسلیک شو

کابل (پژواک، ۱۰ سلواغه ۱۴۰۳): له پېښو سره د مبارزې د چمتووالي ملي ادارې د جاپان له یوې خیریه موسسې سره د څه باندې ۵۰۰ زره امریکایي ډالرو په لګښت د ګډو همکاریو یو هوکړه‌لیک لاسلیک کړ.

له پېښو سره د مبارزې د چمتووالي ملي ادارې خبرپاڼه کې راغلي چې دغه هوکړه‌لیک تېره ورځ په کابل کې د یادې ادارې د سرپرست ملا نورالدین ترابي او د جاپان«AAR Japan»  خیریه موسسې د رییس محمدبشیر باصر ترمنځ لاسلیک شو.

سرچینې زیاته کړې، د لاسلیک شوي هوکړه‌لیک له مخې به یاده موسسه د ۵۰۰ زره او ۲۲۹۶ امریکایي ډالرو په لګښت د کابل ښار او د زابل ولایت په شملزایي، شینکۍ، نرنګ او جلدک ولسوالیو کې د ماینونو او ناچاودو توکو د خطرونو په اړه د عامه پوهاوي پروګرامونه ترسره کړي.

له پېښو سره د مبارزې د چمتووالي ملي ادارې سرپرست ویلي چې دې ادارې تل هڅه کړې څو له هغو موسسو سره همکاري وکړي چې په بشري چارو کې فعالیت کوي.

هغه زیاته کړه: «له موسسو هیله لرو څو د زیاتو مرستو په جذب او مستحقینو ته یې په شفافه او پر وخت وېش کې لا زیاتې هڅې وکړي.»

د سرچینې په حواله، د جاپان د یادې خیریه موسسې رییس ویلي چې د دې موسسې کارکوونکي په مرکز او ولایتونو کې له مرسته‌کوونکو ادارو سره بشپړه همکاري کوي.

دا په داسې حال ده چې له دې مخکې هم له پېښو سره د مبارزې د چمتووالي ملي ادارې له بېلابېلو کورنیو او بهرنیو موسسو سره په بېلابېلو برخو کې د همکاریو هوکړه‌لیکونه لاسلیک کړي دي.