د لوګر د پوهنې له ریاست سره د څه باندې دوه زره کېټه درسي توکو مرسته وشوه

پل‌علم (پژواک، ۱۸ سلواغه ۱۴۰۳): د لوګر پوهنې ریاست وایي چې د ملګرو ملتونو د ماشومانو ملاتړ صندوق (UNICEF) له لوري د دغه ولایت د ۴۵ زره زده‌کوونکو لپاره د درسي توکو مرسته وشوه.

د لوګر د پوهنې ریاست ویاند شاه‌پور عرب پژواک خبري اژانس ته وویل، دا مرسته د پوهنې وزارت یوې همکارې موسسې د زده‌کوونکو هڅولو او هغوی ته د درسي موادو برابرولو په موخه کړې ده.

هغه وايي چې دغه درسي توکي شاوخوا ۲۴۵ زره امریکایي ډالر ارزښت لري.

نوموړي زیاته کړه، په دې مرسته کې ۲۲۴۶ کېټه درسي توکي شامل دي، په یوه کېټ یې د ۲۰ زده‌کوونکو لپاره لس قلمه بېلابېل درسي مواد ځای پر ځای شوي چې د راتلونکي نوي ښوونیز کال له پیل سره به د ۲۸۷ ښوونځیو د لومړنیو دورو پر شاوخوا ۴۴۹۲۰ زده کوونکو ووېشل شي.

عرب زیاتوي، دا مرسته کولای شي چې په ښوونځيو کې د کتابونو کمښت ستونزه تر ډېره هواره کړي.

بلخوا، د لوګر ولایت یوه ښوونکي صدیق الله پژواک ته وویل، د ملګرو ملتونو د ماشومانو ملاتړ صندوق (UNICEF)  له لوري د دغه ولایت له ۴۵ زره زده‌کوونکو سره شوې مرسته یوه لویه لاسته‌راوړنه ده او په نوي کال کې به په ښوونځيو کې تر ډېره د زده‌کوونکو د کتابونو د کمښت ستونزه هواره شي.

نوموړي د پوهنې له وزارته وغوښتل چې په لوګر کې هغو ښوونځيو ته هم ودانۍ جوړې کړي چې زده‌کوونکي یې په ازاده فضا کې له پراخو ستونزو سره په زده‌کړو بوخت دي.

هیره دې نه وي، په لوګر ولایت کې اوس مهال ۲۸۷ بابه ښوونځي د زده‌کوونکو پر مخ پرانیستي چې په کې د نجونو او هلکانو په ګډون ۱۵۰ زره زده‌کوونکي په زده‌کړو بوخت دي.