لینډسي ګراهام: په سنا کې د امریکا له لوري پر غزې د کنټرول لپاره کومه لېوالتیا نشته

کابل (پژواک، ۳۰ سلواغه ۱۴۰۳): د امریکا جمهوري‌غوښتونکي سناتور لینډسي ګراهام ویلي، په سنا کې هیڅ داسې لېوالتیا چې وښيي امریکا دې په هر ډول چې وي د غزې کنټرول ترلاسه کړي، نشته.

د امریکا ولسمشر ډونالډ ټرمپ د غزې پر نیولو او مالکیت ټینګار کړی، خو حماس د دغو څرګندونو په غبرګون کې ویلي چې غزه د پلور لپاره نه ده او فلسطینیان به اجازه ور نه کړي چې پر خاوره یې معامله وشي.

د قطر، مصر، لیبیا، متحده اماراتو، سعودي، اردن او فلسطین د بهرنیو چارو وزیرانو په ګډه بیانیه کې خبرداری ورکړی و چې دغه ډول یو اقدام په سیمه کې د بې‌ثباتۍ لامل کېږي او لا ډېرو جګړو ته زمینه برابروي.

رويټرز راپور ورکړی چې جمهوري‌غوښتونکي سناتور لینډسي ګراهام د دوشنبې په ورځ د غزې د نیولو او د فلسطینیانو د ایستلو لپاره د ډونالډ ټرمپ وړاندیز رد کړ.

هغه ویلي: «په سنا کې هيڅ داسې تمایل چې په هر ډول وي، امریکا دې د غزې کنټرول ترلاسه کړي، نشته.»

راپور کې راغلي چې ډیموکرات سناتور ریچارډ بلومنټال هم ویلي، دی تمه لري عربي هېوادونه د غزې لپاره یوه واقعي حل‌لاره ولټوي.

هغه دغه‌راز ویلي چې د اردن ولسمشر دویم عبدالله ویلي چې عربي هېوادونه به یوه داسې طرحه وړاندې کړي چې په هغې کې به له اسرائیلو سره د اړیکو عادي کول، د فلسطینیانو لپاره د برخلیک ټاکلو حق، سیمه‌ییز دفاعي ترتیبات او د اسرائیلو لپاره امنیت شامل وي.

د هغه په خبره، که دغه موارد د یوې رښتینې طرحې برخه وي، کولای شي د سیمې لپاره یو لوی بدلون رامنځته کړي.

د یادونې ده، د غزې نیولو او له سیمې د فلسطینیانو د ایستلو په اړه د امریکا د ولسمشر ډونالډ ټرمپ له وړاندیز وروسته د اسرائیلو لومړي وزیر هم ویلي وو چې فلسطینیان باید سعودي ته ولېږدول شي.

سعودي او قطر د فلسطینیانو د بېځایه کولو په اړه د اسرائیل د لومړي وزیر بنیامین نتانیاهو څرګندونې غندلې او ویلي یې دي چې فلسطینیان په غزه کې کډوال نه دي چې د اسرائیل په غوښتنه به له خپلې خاورې وځي او د هغوی د بې‌ځایه کېدو طرحه ښکاره د نړۍوالو قوانینو نقض دی.