<p style="text-align: justify;">کابل (پژواک، ۱۲ کب ۱۴۰۳): ستره محکمه وایي چې په درېیو ولایتونو کې اوو کسانو ته د بېلابېلو جرمونو له امله تعزیري سزا ورکړل شوې ده.</p>
<p style="text-align: justify;">د افغانستان سترې محکمې نن په جلا خبرپاڼو کې ویلي، د تخار د چاهاب ولسوالۍ لومړۍ محکمې د پرېکړې له مخې، درېیو کسانو ته چې پر زنا تورن وو، تعزیري سزا ورکړل شوه.</p>
<p style="text-align: justify;">سرچینې زیاته کړې، لومړۍ محکمې دوو تورنو کسانو ته شپږ- شپږ میاشتې تنفیذي بند او ۳۹ – ۳۹ دُرې او یوه بل کس ته یو کال تنفیذي بند او ۳۹ دُرې سزاوې ورکړې دي.</p>
<p style="text-align: justify;">سترې محکمې ویلي، د کابل ولایت د نشهيي توکو او مسکراتو د مخنیوي لومړۍ محکمې د پرېکړې له مخې، يوه کس ته چې د الکولي مشروباتو پر توليد او څښلو متهم و، تعزیري سزا ورکړل شوه.</p>
<p style="text-align: justify;">د سرچینې د معلوماتو له مخې، لومړۍ محکمې ياد متهم پر دوه کاله تنفيذي بند او ۳۹ دُرو تعزیري سزا محکوم کړی و چې یاده پرېکړه د سترې محکمې د عالي مقام له تایید وروسته تطبيق شوه.</p>
<p style="text-align: justify;">دغه راز، سترې محکمې لیکلي چې د ننګرهار د سپينغر ولسوالۍ لومړۍ محکمې د پرېکړې له مخې، درېيو کسانو ته چې پر لواطت متهم وو، تعزیري سزا ورکړل شوې ده.</p>
<p style="text-align: justify;">لومړۍ محکمې ياد متهمين له يو کال څخه تر دوو کلونو پورې پر تنفيذي بند او ۳۹ـ ۳۹ دُرو تعزیري سزاوو محکوم کړي وو چې یاده پرېکړه د سترې محکمې عالي مقام له تایید وروسته پرې تطبیق شوه.</p>
<p style="text-align: justify;">دا په داسې حال کې ده چې پرون هم سترې محکمې ویلي وو چې په کابل ولایت کې یې درېیو کسانو ته د نشهیي توکو د پېر او پلور په جرم تعزیري سزا ورکړې ده.</p>
