کابل (پژواک، ۲۶ کب ۱۴۰۳): د ریاستالوزراء اقتصادي معاونیت وایي، د ملي تدارکاتو کمېسیون د شاوخوا ۲.۵ میلیارد افغانیو په ارزښت اته پروژې منظور، ۱۳ تعدیل او دوې یې لغوه کړې دي.
د ریاستالوزراء اقتصادي معاونیت په خبرپاڼه کې راغلي چې د ملي تدارکاتو کمیسیون ناسته د ریاستالوزرا د اقتصادي مرستیال ملا عبدالغني برادر اخوند په مشرۍ ترسره شوه.
خبرپاڼه کې راغلي چې په دغه ناسته کې له اجنډا سره سم ۲۹ پروژې د بحث لپاره وړاندې شوې چې له جملې یې د اتو پروژو قراردادونه د ۲.۵ میلیارد افغانیو په ارزښت منظور، د ۱۳ تعدیل، د دوو لغوه او شپږ پروژې په تدارکاتي پروسو کې د موجودو ستونزو له امله رد شوې.
سرچينې لیکلي چې د یادو شپږو پروژو په اړه ټاکل شوو کمېټو ته دنده وسپارل شوه څو د تدارکاتي پروسو د اصولو په پام کې نیولو سره یې قراردادونه و ارزوي او راپور یې د ملي تدارکاتو کمېسیون له مشرتابه سره شریک کړي.
په منظور شوو او تعدیل شوو پروژو کې د کندهار ولایت د دهلې بند د ساتنې او پاملرنې چارو بشپړول، د کابل طبي پوهنتون په علياباد روغتون کې د سرطاني ناروغيو د درملنې مرکز د پاتې چارو بشپړول، د کندهار ولایت په دامان ولسوالۍ او باغ پل سیمه کې د ترانسپورټي ترمینلونو جوړول، د کابل – کندهار لویې لارې د پاتې برخو بشپړول او یو شمېر نورې پروژې شاملې دي چې د اسلامي امارت له لوري تمویلېږي.
GET IN TOUCH
NEWSLETTER
SUGGEST A STORY
PAJHWOK MOBILE APP