په درېیو ولایتونو کې پر څلور کسانو د قصاص حکم پلی شو

کابل (پژواک، ۲۲ وری ۱۴۰۴): ستره محکمه وایي، په فراه، نیمروز او بادغیس ولایتونو کې پر څلور کسانو د قصاص حکم پلی شو.

د سترې محکمې په خبرپاڼه کې راغلي چې دغه حکم نن پر دوو کسانو په بادغیس او پر دوو نورو کسانو په فراه او نیمروز ولایتونو کې د درې‌ګونو محکمو او د اسلامي امارت د رهبر له تایید وروسته پلی شوی دی.

د سرچینې د معلوماتو له مخې، لومړی قاتل سلیمان نومېده چې د بادغیس ولایت د تګاب‌علم ولسوالۍ د چاه‌جلال کلي اوسېدونکی و او درې کسان یې د کلاشینکوف په ډزو وژلی وو، دویم قاتل حیدر د مجنون زوی د بادغیس ولایت د دره‌بوم ولسوالۍ د نخچرستان کلي اوسېدونکی و چې یو تن یې د کلاشینکوف د ډزو په وسیله وژلی و.

سترې محکمې دغه راز لیکلي چې نن د نیمروز ولایت په مرکز زرنج ښار د شهید حقاني ورزشي سټډیوم کې هم پر یو کس د قصاص هم حکم پلی شو.

سرچینې زیاته کړه چې دغه کس عبدالقدیر نومېده او د زرنج ښار اوسېدونکی و چې د تفنکچې په وسیله یې یې یو تن وژلی و.

دغه راز، په فراه ولایت کې هم نن پر یوه تن د قصاص حکم پلی شوی دی.

سترې محکمې لیکلي چې یاد کس محمدصادق نومېده، د فراه ولایت د شیب‌کوه ولسوالۍ اوسېدونکی و چې د چاقو په واسطه یې یو تن وژلی و.

د یادونې ده چې اسلامي امارت له دې مخکې هم د قصاص په ګډون په بېلابېلو ولایتونو کې مجرمینو ته تعزیري سزاګانې ورکړې دي.