ملګرو ملتونو پر ایران د اسرائیل د برید په اړه اندېښنه څرګنده کړه

کابل (پژواک، ۲۳ غبرګولی ۱۴۰۴): د ملګرو ملتونو سرمنشي د ایران پر اټومي تاسیساتو د اسرائیل د برید په اړه اندېښنه څرګنده کړې او له دواړو لورو یې د زغم غوښتنه کړې ده.

د راپورونو له مخې، اسراییلي چارواکو ویلي چې نن سهار (جمعه، د غبرګولي ۲۳مه) یې د ایران اټومي تاسیسات، د بالستیک توغندیو د تولید کارخونې او پوځي قوماندانان په نښه کړي دي.

د ملګرو ملتونو د سر منشي مرستیال ویاند فرحان حق په یوه خبرپاڼه کې ویلي، بریدونه په داسې حال کې شوي چې د تهران او واشنګټن ترمنځ د ایران د اټومي پروګرام په اړه مذاکرات لاهم روان دي.

هغه زیاته کړې چې د ملګرو ملتونو سرمنشي په منځني ختیځ کې هر ډول تاوتریخوالی غندي او له دواړو خواو غواړي چې له زغم کار واخلي.