<p style="text-align: justify;">فېروزکوه (پژواک، ۱۸ چنګاښ ۱۴۰۴): په غور او بادغیس ولایتونو کې سیمهییزې سرچینې د څه باندې ۱۱ کیلوګرامه نشهیي توکو د کشف او ضبط او د خلکو د ځورونې او نشهيي توکو د قاچاق په تور د پنځو کسانو د نیول کېدو خبر ورکوي.</p>
<p style="text-align: justify;">د غور د امنیې قوماندانۍ ویاند مولوي عبدالرحمن بدري پژواک خبري اژانس ته وویل: «د امنیې قوماندانۍ د دویم سمت کشفي ځواکونو په یو لړ عملیاتو کې د فيروزکوه ښار په اختهخانه کلي کې د نشهيي توکو دوه قاچاقکوونکي نیولي دي.»</p>
<p style="text-align: justify;">هغه زیاته کړه له نیول شوو کسانو سره یو موټرسایکل او ۱۱.۵ کیلوګرامه «ایف» نشهيي توکي نیول شوي دي.</p>
<p style="text-align: justify;">هغه دغهراز زیاته کړه چې نیول شوي کسان تر څېړنې لاندې دي، دوسیې به یې له بشپړېدو وروسته عدلي او قضايي بنسټونو ته وسپارل شي.</p>
<p style="text-align: justify;">د یوه بل خبر له مخې، د بادغیس امنیتي مسوولین وايي چې د دغه ولایت د امنیې قوماندانۍ ځواکونو هم د غلا، د خلکو د ځورونې او د نشهيي توکو د قاجاق په تور درې کسان نیولي دي.</p>
<p style="text-align: justify;">د باغیس د امنیې قوماندانۍ ویاند صدیقالله صدیقي د یوې خبرپاڼې په خپرولو ویلي چې له جنايي جرمونو سره د مبارزې پولیسو په یو لړ کشفي عملیاتو کې د قعلهنو ښار اړوند څلورمه حوزه کې څلور کسان چې په غلاوو، د نشهيي توکو په استعمال او د خلکو په ځورولو کې یې لاس درلود، نیولي دي.</p>
<p style="text-align: justify;">هغه زیاته کړه چې له دغو کسانو یوه تومانچه، یو چاقو او یو شمېر نور وسایل ترلاسه شوي دي.</p>
<p style="text-align: justify;">سرچینې زیاته کړې، له لومړنیو پلټنو وروسته به د یادو کسانو دوسیې عدلي او قضايي ارګانونو ته وسپارل شي.</p>
