<p style="text-align: justify;">هرات (پژواک، ۱۸ زمری ۱۴۰۴): د هرات د کرنې، اوبولګولو او مالدارۍ ریاست مسوولین وايي چې په دغه ولایت کې د پالونیا نیالګیو پالنې او اېښودو ته د کروندګرو لېوالتیا ورځ تر بلې په ډېرېدو ده.</p>
<p style="text-align: justify;">د هرات د کرنې ریاست د ترویج مدیر بشیراحمد احمدي د یاد مطلب څرګندولو ترڅنګ وویل چې یادې ونې د چټکې ودې، بېلابېلو اقلیمي شرایطو پر وړاندې د مقاومت او د لرګیو په صنعت کې د پراخې کارونې له امله د کروندګرو او پانګهوالو د پام وړ ګرځېدلې دي.</p>
<p style="text-align: justify;">د هغه په وینا، چټکه وده، د باکیفیته لرګیو تولید او د هرات مناسب اقلیمي شرایط د دې لامل شوي چې خلک د پالونیا نیالګیو پالنې او اېښودو ته مخه کړي.</p>
<p style="text-align: justify;">د هرات یو شمېر بڼوال او ځمکوال هم وايي چې د پالونیا ونه د اقتصادي ګټې ترڅنګ د چاپېریال د ښېرازۍ او د هوا ککړتیا مخنیوي برخه کې هم اغېزناک رول لري.</p>
<p style="text-align: justify;">هغوی زیاتوي چې د یادې ونې د پلور بازار په کور دننه او بهر مناسب دی او د عاید ترلاسه کېدو پر دوامداره سرچینې بدلېدلای شي.</p>
<p style="text-align: justify;">هرات کې یو کروندګر فضلاحمد چې د پالونیا نیالګیو د روزنې برخه کې یې پنځه میلیونه افغانۍ پانګونه کړې وايي: «د حکومت د ملاتړ په صورت کې کولای شو د وارداتي لرګیو له اړخه د هرات اړتیا پوره کړو.»</p>
<p style="text-align: justify;">د یادولو ده، د پالونیا ونې د پلنو پاڼو په درلودو او چټکې ودې سره د اکسېجن د تولید لوړ ظرفیت لري او د درېیو کلونو په موده کې ۱۵ متره یا تر دې ډېرې لوړې شي.</p>
<p style="text-align: justify;">پالونیا ونې چې په دې وروستیو کې په هرات کې ترویج شوې، له دې امله چې ډېرې ګټې لري، د کروندګرو پام ور اوښتی دی.</p>
