<p style="text-align: justify;">هرات (پژواک، ۲۹ زمری ۱۴۰۴): هرات کې ځايي مسوولین وايي چې په دغه ولایت کې د تېرې شپې خونړۍ ترافیکي پېښې د ټولو قربانیانو جسدونه کابل ته لېږدول کېږي، خو د سختې سوځېدنې له امله د پېژندلو وړ نه دي.</p>
<p style="text-align: justify;">تېره شپه یو مسافر وړونکی «۵۸۰» موټر چې د اسلامکلا له بندره کابل ته پر لاره و، د ګذرې ولسوالی مربوطاتو کې له یوه موټرسایکل او باروړونکي مازدا موټر سره ټکر شوی او وروسته یې اور اخیستی دی.</p>
<p style="text-align: justify;">په دې پېښه کې ۷۹ کسانو ژوند له لاسه ورکړی چې ۷۶ یې له ایرانه تازه راستانه شوي کډوال دي.</p>
<p style="text-align: justify;">د هرات د اطلاعاتو او فرهنګ رییس او د کډوالو چارو ته د رسېدنې عالي کمېسیون ویاند مولوي احمدالله متقي وايي چې د تېرې شپې خونړۍ ترافیکي پېښې د «شهیدانو» د لېږد، تجهیز او تکفین چارې د ملي دفاع وزارت او په دغه ولایت کې د ۲۰۷ الفاروق قولاردو له لوري پیل شوې دي.</p>
<p style="text-align: justify;">هغه زیاته کړه چې د قربانیانو مړي لومړی د قولاردو روغتون ته لېږدول شوي او ټاکل شوې ټول جسدونه د پېژندلو او خپلو کورنیو ته د سپارلو لپاره د کابل مرکزي روغتون ته ولېږدول شي.</p>
<p style="text-align: justify;">په همدې حال کې، د هرات د اطلاعاتو او فرهنګ رییس وايي چې د دې پېښې قربانیان د کابل، کاپیسا، بغلان، کندوز، میدانوردګو، غزني او بامیان ولایتونو اوسېدونکي وو.</p>
<p style="text-align: justify;">ورته مهال، د هرات د ۲۰۷ الفاروق قولاردو د روغتون سرطبیب ملا جانان مقدس وايي چې د قربانیانو جسدونه د سختې سوځېدنې له مله د پېژندلو وړ نه دي.</p>
