<p style="text-align: justify;">کابل (پژواک، ۱۰ لېندۍ ۱۴۰۴): د کرنې، اوبولګولو او مالدارۍ وزارت وایي، سږ کال په ننګرهار کې د مالټو حاصلات ۲۲۱۴ مټریک ټنه اټکل شوي چې د تېر کال په پرتله شاوخوا پنځه سلنه زیاتوالی ښيي.</p>
<p style="text-align: justify;">د کرنې، اوبولګولو او مالدارۍ وزارت نن په یوه خبرپاڼه کې لیکلي چې دا مهال د دغه ولایت په ۱۳ ولسوالیو کوز کونړ، درهنور، ګوشته، رودات، کوټ، بټيکوټ، اچین، غنيخېل، مومندره، سرهرود، خوږیاڼي، نازیان او چپرهار کې پر ۲۱۵،۶ هکتاره ځمکه د مالټو بڼونه جوړ شوي او تمه ده چې سږ کال به یې حاصل د تېرو کلونو په پرتله ښه وي.</p>
<p style="text-align: justify;">سرچینې دغهراز زیاته کړې، تېر کال د مالټو د کښت ساحه ۲۰۴،۶ هکتاره وه او ۲۱۰۸،۷۵ مټریک ټنه حاصل یې ورکړی و، خو سږ کال د باغونو پراخېدو او د هغو د ښه مدیریت له امله د حاصلاتو کچه لوړه شوې ده او ۲۲۱۴ مټریک ټنه اټکل شوي چې د تېر کال په پرتله شاوخوا پنځه سلنه زیاتوالی ښيي.</p>
<p style="text-align: justify;">خبرپاڼه کې راغلي چې د دغه ولایت ولسوالیو کې سلګونو بڼوالو ته د کرنیزو وسایلو د مرستې ترڅنګ، د بڼونو د پالنې، سرې کارونې، اوبولګولو او د ناروغیو مخنیوي برخه کې لازمه روزنه ورکړل شوې، څو بڼوال وکولای شي لا معیاري او زیات حاصل ترلاسه کړي.</p>
<p style="text-align: justify;">سرچینې زیاته کړې چې په راتلونکي کال کې به هغو بزګرانو ته چې له بڼوالۍ سره لېوالتیا لري، د ستروسو او نورو مېوو نوي بڼونه هم جوړ شي، څو د کرنې سکټور پیاوړی او د خلکو اقتصادي وضعیت لا ښه شي.</p>
<p style="text-align: justify;">د کرنې، اوبولګولو او مالدارۍ وزارت د معلوماتو له مخې، ننګرهار د افغانستان له هغو ولایتونو دی چې د مناسبې هوا، حاصلخیزې ځمکې او کافي اوبو له امله د ستروسو ونو لپاره مناسبه سیمه ده او مالټه، ليمو او نورې مېوې نه یوازې د کورني بازار اړتیاوې پوره کوي، بلکې د صادراتو له پلوه هم ارزښت لري.</p>
