نړیوال خبرونه

رویټرز خبري اژانس د امریکا د ولسمشر ډونالډ ټرمپ له قوله راپور ورکړی چې دغه هېواد به راتلونکې اونۍ له ایران سره اټومي مذاکرات پیل کړي خو ایراني چارواکو تر اوسه په دې اړه څه نه دي ویلي.

قطر د ملګرو ملتونو سرمنشي ته په یوه لیک کې د العدید پر اډه د ایران پر توغندیز برید اعتراض کړی خو ایران ټینګار کړی چې دغه «دفاعي اقدام» باید د «دوست او ګاونډي هېواد قطر» پر ضد ونه بلل شي.

د اسرائیل د لومړي وزیر دفتر اعلان کړی چې بنیامین نتانیاهو د امریکا د ولسمشر د اوربند وړاندیز منلی او ټاکل شوې د نن ورځې تر پایه یوه اعلامیه خپره کړي.

د امریکا ولسمشر ډونالډ ټرمپ پر ټولنیزه شبکه «ټروت سوشل» یوه پیغام کې ایران او اسرائیل ته په خطاب کې لیکلي: «اوربند اوس پیل شوی دی؛ لطفاً هغه مه نقضوئ.»

د راپورونو له مخې، د ایران پر تهران او ځینو نورو سیمو د اسرائیل او دغه راز پر اسرائیل د ایران بریدونو د نن سهار تر څلورو بجو دوام درلود.

د امریکا ولسمشر اعلان کړی و چې د ایران او اسرائیل ترمنځ اوربند په څو راتلونکو ساعتونو کې پیلېږي خو د ایران د بهرنیو چارو وزیر ټینګار کړی چې په دې برخه کې هيڅ هوکړه نشته او ایران به یوازې په هغه صورت کې چې د سهار تر څلورو اسرائیل خپل بریدونه ودروي، ځوابي بریدونو ته دوام ور نه کړي.

د ملګرو ملتونو سرمنشي پر ایران د امریکا برید په سیمه کې یو «خطرناک بدلون» بللی او د امنیت له شورا یې غوښتي چې د جګړې درېدو لپاره بېړنی اقدام وکړي؛ روسیه پر دغه اقدام سخته نیوکه کړې او دا یې د ملګرو ملتونو د منشور نقض بللی خو امریکا ویلي چې دغه برید «د ایران د بېړني ګواښ پر وړاندې اړین ځواب» و.

د ایران د بهرنیو چارو وزیر سیدعباس عراقچي چې تېره شپه د روسیې پلازمېنې مسکو ته رسېدلی، ویلي چې د روسیې له ولسمشر ولادیمیر پوتین سره په لیدنه کې به له ګډو ستونزو او ګواښونو سره د مبارزې، په ځانګړې توګه د وروستیو بریدونو په اړه خبرې وکړي.

د راپورونو له مخې، د سوریې په پلازمېنه دمشق کې په یوه کلیسا کې د یکشنبې ورځې ځانمرګي برید له امله ۲۰ کسان وژل شوي او لږ تر لږه ۵۲ نور ټپیان دي.

سعودي عربستان او پاکستان پر ایران د امریکا بریدونه غندلي؛ پاکستان ټینګار کړی چې ایران د ملګرو ملتونو د منشور له مخې له خپلو مشروع حقونو د دفاع حق لري او عربستان له نړۍوالې ټولنې غوښتي څو د ناورین پای ته رسېدو لپاره یوه سیاسي حل‌‌لاره ومومي.

د ایران د بهرنیو چارو وزیر سیدعباس عراقچي روسیې ته ځي او ټاکل شوې د دغه هېواد له ولسمشر ولادیمیر پوتین سره وګوري.

د امریکا د پارلمان یوه غړي ویلي چې کانګرېس ټرمپ ته پر ایران د برید اجازه نه ‌ده ورکړې او هم‌مهاله ایران – په داسې حال کې چې پر اسرائیل یې تازه بریدونه کړي – د ملګرو ملتونو له امنیت شورا د بېړنۍ غونډې جوړولو غوښتنه کړې او ویلي یې دي، حق لري د امریکا د «تېري» پر وړاندې ودرېږي.