احمدشاه عرفانیار

د کډوالۍ نړۍوال سازمان (IOM) وایي، د روان کال د وري له ۱۵مې راهیسې یې له پاکستانه راستانه شوي نږدې ۱۰۰ زره افغانان ثبت کړي او زیاتوي چې له هغوی سره د مرستو لپاره لا زیاتو سرچینو ته اړتیا ده.

تېره اونۍ، روسیې د افغانستان استازي ته د کازان په اقتصادي فورم کې د ګډون بلنه ورکړه، قزاقستان د تورغونډۍ – هرات اوسپنې پټلۍ پروژه کې د ۵۰۰ میلیون ډالرو پانګونې خبر ورکړی او کابل وویل چې مسکو ته د سفیر په کچه ډیپلومات معرفي کوي.

د کشمیر تر خونړي برید وروسته، د هند او پاکستان اړیکې یو ځل بیا سختې ترینګلې شوې دي؛ مودي د سخت غبرګون ګواښ کړی او اسلام‌اباد د ملي امنیت بېړنۍ غونډه جوړه کړې څو د هند د اقداماتو پر وړاندې د غبرګون پرېکړه وکړي.

د روسیې د بهرنیو چارو وزیر سرګي لاوروف ویلي چې د اسلامي امارت له بیا واکمنېدو وروسته لوېدیځ هېوادونه هم هڅه کوي چې خپل شتون په دغه هېواد کې بیا تثبیت کړي.

د افغانستان بانک وايي، راتلونکې شنبه (د غويي ۶مه) د داوطلبۍ له لارې ۱۵ میلیونه امریکایي ډالر لیلاموي.

د پوهنې وزارت چارواکو له افغان ‌کډوالو د سویې د تثبیت ازموينې په تړاو جوړه شوې غونډه کې ویلي چې ا.ا به ټولو راستنېدونکو افغان کډوالو ته د زده‌کړو زمینه برابره کړي.

تېره اونۍ، روسیې ا.ا د ممنوعه ډلو له نوملړه وایست او په داسې حال کې د اسلام‌اباد پلاوی کابل ته راغی او له کابله یو پلاوی اسلام‌اباد ته ولاړ چې پاکستان په زور د افغان کډوالو ایستل پیل کړي او بېلابېلو لوریو پر دې چاره نیوکې کړې دي.

چارواکي وایي، د پوهنې وزارت چارو کې د اسانتیا لپاره ۱۳۶ پېچلې اداري پروسې ساده شوې، تر دې مخکې هم په بېلابېلو ادارو کې ۸۰۶ ورته پروسې ساده شوې وې او دا لړۍ روانه ده.

د سره صلیب او سرې میاشتې نړۍوال فدراسیون له پاکستانه د افغان کډوالو د ایستلو څپې په غبرګون کې د رامنځته‌کېدونکو شرایطو په اړه د اندېښنې په څرګندولو اعلان کړی چې د دغو کډوالو له ډلې ۵۰ زره کسانو ته د لومړنیو خدمتونو وړاندې کولو لپاره د افغاني سرې میاشتې له ټولنې سره مرسته کوي.

د کورنيو چارو وزارت وايي، د خوست پولیسو د دغه ولایت په مرکز کې د یو لړ عملیاتو په ترڅ کې یو «وسله‌‌وال او مشهور قاچاق‌وړونکی» نیولی دی.

تېره اونۍ، بريتانیا ویلي‌ چې هڅه کوي افغانستان یو ځل بیا د م.م اجنډا په سر کې ځای ومومي، بېلابېلو سرچینو له پاکستانه وغوښتل چې د افغان کډوالو د ایستلو لړۍ ودروي او دغه راز ا.ا د یوناما د څرګندونو په غبرګون کې ویلي، ځيني استخباراتي سازمانونه د عامه ذهنونو د مغشوشولو هڅه کوي.

د پېښور محکمې د پاکستان له امنیتي بنسټونو غوښتي چې د «پي‌اراو» کارت‌لرونکي افغانان ونه نیسي یا ونه وباسي؛ ځکه د هغوی د قانوني استوګنې وخت د روان کال د جون تر ۳۰مې غځول شوی دی.