نورالله ځاځی

د کډوالو په چارو کې د ملګرو ملتونو عالي کمېشنرۍ او د جاپان حکومت ترمنځ د شپږ میلیون امریکايي ډالرو په ارزښت تړون لاسلیک شو.

د کورنیو چارو وزارت له نشه‌یي توکو سره د مبارزې د مرستیال ملا عبدالحق اخند همکار په مشرۍ یو پلاوی د ایران په رسمي بلنه دغه هېواد ته سفر وکړ.

د ریاست‌الوزراء اقتصادي مرستیال، کابل کې د اوبو نړۍوال څېړنیز کنفرانس کې د اوبو پر مدیریت ټینګار وکړ، ویې ویل چې افغانستان د اوبو پراخې سرچینې لري خو په معاصر تاریخ کې ورسره مسلکي او ملي چلند نه دی شوی.

د احصایې او معلوماتو ملي اداره وايي، د تېرې یوې میاشتې په اوږدو کې یې افغانستان ته د هوايي ډګرونو او ځمکنيو بندرونو له لارې د ۲۴۶۵ بهرنیو وګړو تګ راتګ ثبت کړی دی.

د افغانستان د بهرنیو چارو وزارت مالي او اداري مرستیال کابل کې د اذربایجان له سفیر سره په لیدنه کې د دوه اړخیزو اړیکو پر پیاوړتیا او دوام ټینګار وکړ.

د عامې روغتیا وزارت په ۱۶ ولایتونو کې د ماشومانو ګوزڼ (پولیو) ضد واکسین د درې ورځني فرعي کمپاین د پیل خبر ورکوي چې په ترڅ کې به یې ۶،۳ میلیون ماشومان واکسین شي.

د کډوالو په چارو کې د ملګرو ملتونو عالي کمېشنرۍ اعلان کړی چې د افغانستان په مرکزي سیمو کې ۱۹۰ دايمي سرپناوې جوړې شوې دي.

د افغانستان د اوبو او انرژۍ وزارت سرپرست وايي چې له پنجشېره کابل ته د اوبو لېږد پروژې د سروې او ډیزاین چارې بشپړې شوې دي او د بودجې او نورو اړینو امکاناتو په چمتو کېدو سره به یې په راتلونکي کې چارې هم پيل شي.

د ریاست‌الوزراء اقتصادي مرستیال چې نن د ازبکستان له سفره بېرته کابل ته راستون شو، وویل د ۵۰۰ کیلوولټ برېښنا مزي غځولو پروژه چې پخوا یې تړون په ۲۵۲ میلیون ډالرو شوی و، له بحثونو وروسته ازبکستان دغه تړون ۲۲۲ میلیون ډالرو ته راټیټ کړ.

د افغانستان بانک سرپرست د ازبېکستان مرکزي بانک له رییس سره په لیدنه کې ویلي چې له ازبېکستان سره د بانکوالۍ برخې پراختیا کولای شي د سوداګریزو اړیکو د لا غوړېدو سبب شي.

د امریکا د پوځ مرکزي قومانداني وایي، سوریه کې یې له القاعده شبکې سره د تړلي یوه سازمان «یو لوړ پوړی غړی» په یوه هوایي برید کې له منځه وړی دی.

ازبکستاني چارواکو له افغانستان سره د اقتصادي اړیکو پر پراختیا ټینګار کړی او ویلي یې دي چې تاشکند په ټولو اقتصادي برخو کې له کابل سره ګډ کار ته لېوال دی.