غزني ښار( پژواک ٨ مرغومى ٩٠): د غزني په ده يک ولسوالۍ کې د اوبو د زېرمه کولو بند پرانېستل شو.
د غزني والي موسى خان اکبرزاده نن د (مرغومي په ٨ مه) د ياد بند د پرانېستلو پر مهال پژواک اژانس ته وويل، چې د اوبو د زېرمه کولو بند د ولايتي بيارغونې ډلې له خوا د څلور سوه اويا زره ډالرو په لګښت جوړ شو.
د هغه په وينا، له دغه بند سره به د سيمې د کروندګرو ١٥ زره جريبه ځمکې ته اوبه ورسيږي او د خلکو په اقتصادي وده کې به زياته ونډه ولري.
نوموړي وويل، چې په راتلونکي کال کې په پام کې لري، چې په څلورو نورو ولسواليو کې هم د اوبو د زېرمه کولو ورته بندونه جوړ کړي.
دغه بند د واورو او بارانونو د اوبو د زېرمه کولو په موخه جوړ شوى دى .
د غزني د کرنې، مالدارۍ او اوبو لګولو رييس سلطان حسين عباسيار هم دا ډول بندونه د کرنيز اقتصاد په وده کې خورا اغېزمن وبلل.
نوموړي وويل، چې له يوې خوا د بند زېرمه شوې اوبه پراخې ځمکې خړوبولى شي او دغه راز ور څېرمه کاروزنه هم ترې تازه کېداى شي.
د ده يک ولسوالۍ د سيمه ييزې شورا مشر نصرالله د دې بند جوړېدل د ټول ده يک لپاره ګټور بولي.
هغه پژواک اژانس ته وويل، چې دغه ولسوالۍ ٧٢ زره نفوس لري، خو د بند اوبه به د دې شمېر نيمايي خلکو لپاره ګټورې تمامې شي.
ده وويل: (( پخوا د باران او سيلاب اوبو کرنيزو ځمکو ته ډېر زيانونه اړول، خو اوس له يوه لوري د سيلابونو مخه ډب شوه او له بل لوري زېرمه شوې اوبه د سيمې کرنيز اقتصاد نور هم پياوړى کولاى شي.))
