منځپانګې ته تلل
دوشنبه ۱۶ نومبر ۲۰۲۶ · کابل ۱۰:۳۰ غ.م
۱۱° — په ټولو ولایتونو کې هوا
صاف · ↑۱۴° ↓۱°
د هوا کیفیت: منځنی

پاکستان په کراچۍ بندر کې د افغان ماشومانو لپاره دوه ډوله درمل هم بند کړي

· ۲ دقیقې لوستل · ۵۹ کتنې

جلال اباد (پژواک ٣ غويى ٩١): د پاکستان په کراچۍ بندر کې د کانټينرونو د بندېدو له امله افغان ماشومان د ويټامين A او چنجيو له ګوليو بې برخې پاتې شول.

په ننګرهار کې د عامې روغتيا چارواکي وايي، چې د روان لمريز کال د پوليو ضد کمپاين يې په داسې مهال پيل کړ، چې په کراچۍ کې د کانټينرونو د ايسارولو له امله د ويټامين A کپسول او د چنجيو ګولۍ لا هم بندې پاتې دي.

د دغه ولايت د عامې روغتيا رييس ډاکتر بازمحمد شېرزاد د غويي په ٣مه په يوه خبري غونډه کې وويل، تمه يې درلوده، چې نن د يکشنبې په ورځ د ختيځو څلورو ولايتونو (ننګرهار، کونړ، لغمان او نورستان) ٨٤٠زره له پنځو کلونو کم عمره ماشومانو ته د ګوزڼ ضد څاڅکو ترڅنګ د ويټامين A او چنجيو ضد ګولۍ هم ورکړي.

خو هغه زياته کړه، چې د پاکستان په کراچۍ بندر کې د کانټينرونو بندېدو له امله افغان ماشومان د ويټامين A او چنجيو له ګوليو محروم پاتې شول.

شېرزاد وويل، چې په ختيځو ولايتونو کې د ګوزڼ کومه مثبته پېښه نه ده ليدل شوې.

د ده په وينا، پنځه زرو دوه سوه رضاکاران به درې ورځې د دغې سيمې په ٥٢ اداري واحدونو کې اته سوه څلوېښت زرو ماشومانو ته د پوليو ضد څاڅکي ورکړي.

ډاکټر شېرزاد وويل، چې په دغې چاره کې ورسره په داوطلب ډول ٦٦١ تنه د جوماتونو امامان او ښوونکي مرسته کوي.

شېرزاد وويل، په ټول هېواد کې د روان لمريز کال له پيله راهيسې ٦ مثبتې پېښې ليدل شوې چې درې يې په کندهار،٢ په هلمند او يوه په پکتيا کې ده.

د عامې روغتيا رييس وويل، په غرني نورستان کې هوا ګرمه شوې او امنيت ښه شوى، چې په وينا يې د نهو کورډيناتورانو، ٤١ سوپروايزرانو او درې سوه اويا رضاکارانو له لوري به د دغه ولايت څه باندې ٣٩زره ماشومانو ته د پوليو څاڅکي ورکړل شي.

د يادونې ده، چې تېر کال د سرحدي نا اراميو او کډواليو له امله په کونړ او ننګرهار ولايتونو کې د ګوزڼ دوه مثبتې پېښې ليدل شوې وې.