ترينکوټ( پژواک، ۴ غبرګولی ۹۱): په داسې حال کې ، چې د اروزګان يو شمېر اوسېدونکي وايي ، چې په مرکزي روغتون کې وينه نشته او په دغه برخه کې له ستونزو سره مخ دي، يو شمېر سيمه ييزو چارواکيو دغه روغتون ته وينه ورکړه.
د يادې ستونزې د حل په موخه نن د اروزګان ولايت د والي اميرمحمداخندزاده په ګډون ددې ولايت د يوشمېر ادارو مشران او نور کار کوونکي د ترينکوټ مرکزي روغتون ته د وينې ورکولو په موخه ورغلي و .
د اروزګان والي له وينې ورکولوڅخه وروسته وويل : (( خوښ يم چې نن د اروزګان هغو بېچاره او ناداره خلکو لپاره خپله وينه ورکوم ، چی هغوی د بېلابېلوناروغيو له امله د وينې له کموالي سره مخ دي.))
اخندزاده ددې ولايت له ټولو دولتي کارکوونکو څخه غوښتنه وکړه، چي راشي او خپله وينه د وينې بانک ته ورکړي، تر څو د وينې د کموالي هغه تشه ډکه کړي ، چی دامهال مرکزي روغتون ورسره مخ دی .
همدارنګه د اروزګان د عامې روغتيا رييس ډاکتر خان اغا مياخېل د دولتي چارواکيو ددې کار ستاينه وکړه ، چی په خپله خوښه يې د وينې له بانک سره په زرګونو سيسي وينې مرسته وکړه .
دده په وينا، د وينې بانک د وينې د نشتون له امله له ډيرو ستونزو سره مخ و .
مياخېل زياته کړه ، چې د اروزګان د ډيرو اوسېدونکو اقتصادي حالت ښه نه دى او د اړتيا په وخت کې نشي کولاى ، چې په پيسو وينه وپيري .
دهغه په وينا، که خلک په خپله خوښه راشي او په وړيا توګه خپله وينه د وينې بانک ته ورکړي ، تر ډيره بريده به په دې ولايت کې د وينې د نشتوالي ستونزه هواره شي .
همدارنګه د اروزګان په مرکزي روغتون کې د زيبا په نوم يوې ميرمنې ، چې وړوکی ماشوم زوی يې دغه روغتون ته راوړى و، پژواک خبري اژانس ته وويل : (( زوی مې د وينې کموالي له ناروغۍ سره مخ دى او د وينې ګروپ يې هم په اسانه ،نه پيدا کيږي او دلته د وينې په بانک کې هم وينه نشته .))
زيبا له دولتي کارکونکو څخه په مننې سره وويل ، چې که د اروزګان ټول اوسېدونکي دغه شان احساس پيدا کړي ، نو په اروزګان کې به د وينې د کموالي ستونزه هواره شي .
دغه راز د لطف الله په نوم د اروزګان يو بل اوسېدونکي هم وويل ، چې له ډيرې مودې راهيسې د مرکزي روغتون د وينې بانک د وينې د کموالي له ستونزې سره مخ دى .
هغه وايي ، چې څه موده مخکې ده خپل يو ټپي مرکزي روغتون ته د درملنې په موخه وړى و، خو د وينې د نشتوالي له امله له ډيرو ستونزو سره مخ شو.
هغه زياته کړه :((د وينې په بانک کې وينه نه وه، زه لاړم او په پيسو مې وينه وپيرله، ترڅو مو مريض له مرګ څخه وژغورل شي .))










