منځپانګې ته تلل
دوشنبه ۱۶ نومبر ۲۰۲۶ · کابل ۱۰:۱۴ غ.م
۱۱° — په ټولو ولایتونو کې هوا
صاف · ↑۱۴° ↓۱°
د هوا کیفیت: منځنی

په خوست کې د منځني طب د زده کړو موسسه جوړيږي

· ۲ دقیقې لوستل · ۶۴ کتنې

کابل ( پژواک، ١٧وږى ٩١) : د خوست د ولايتي روغتون تشکيلات پراخيږي او په دې ولايت کې به د منځني طب د زده کړو موسسه جوړه شي .

دخوست ولايت د عامه اړيکو مسوول بريالي روان نن پژواک خبري اژانس ته وويل ، چې د عامې روغتيا وزيرې ثريا دليل دغه ژمنه تېره ورځ د خوست ولايت لخوا کابل ته له استول شوي ٢١ کسيز پلاوي سره وکړه .

سرچينه ليکي ، چې په دغه ليدنه کې د خوست ولايت د روغتيايي وضيعت ،پرمختګونو، ستونزو  او د خلکو غوښتونو ته  په کتو په ځينو مهمو موضوعاتو او  وړانديزو خبرې  وشوې.

د سرچينې د معلوماتو له مخې، پلاوي د عامې روغتيا وزيرې ته وړانديز وکړ ،  چې  په  بېړني ډول   د خوست په مرکز کې د اوسني ١٥٠ بستريز روغتون تشکيلات  او نور اړوند  امکانات  د ٢٠٠ بستريز روغتون په کچه لوړ کړي.

دغه راز روان وايي ، چې پلاوي  د خوست د ولايتي روغتون د اداري چارو ودانۍ د جوړېدو  او په دې ولايت کې  د منځني طب د زده کړو  موسسې د جوړېد غوښتنه هم وکړه.

دا مهال د خوست پوهنتون په چوکاټ کې د طب پوهنځى هم فعاليت لري.

 د خوست د عامه اړيکو د مسوول  د معلوماتو له مخې، ثريا دليل په خوست کې پر شويو پرمختګونو د خوښۍ د څرګندولو تر څنګ وويل ، چې   د خوست ولايتي روغتون تشکيلات به لوړ کړي او ډېر ژر به  د خوست ولايتي ملکي روغتون ته په ټولو روغتيايي اسانتياوو سمبال امبولانس موټر ورکړي.

سرچينه وايي ، چې  د عامې روغتيا وزيرې د دې څنګ ژمنه وکړه، چې په راتلونکي کال کې به  د خوست ولايتي ملکي روغتون ته اړينې  نورې ودانۍ هم  جوړې او په دې ولايت کې به د منځينو زده کړو موسسه جوړه کړي .