کابل (پژواک١٣کب٩١) :د افغانستان په درېيو ولايتونو کې د جاپان په ٢٤،٨ مېلېون امريکايي ډالره بې بدله مرسته د اوبو او برېښناکوچني بندونه جوړيږي .
په دې اړه نن په کابل کې د اوبو او برېښنا وزير محمداسماعيل، په افغانستان کې د خوړو د نړيوال سازمان له مشر عثمان ګويندو سره تړون لاسليک کړ.
محمد اسماعيل وويل: ((د دې پروژې پيسې جاپان هېواد ورکوي ، پلي کوونکي به يې هغه شرکتونه وي ، چې د اوبو او برېښنا وزارت يې غوره کوي او د خوړو نړيوال سازمان يې څارونکې اداره ده .))
هغه د نورو معلوماتو له ورکولو پرته وويل ، چې په يادو پيسو به په کابل ، کاپيسا او باميانو ولايتونو کې د اوبو او برېښنا د کوچنيو بندونو د جوړولو ترڅنګ ، په يادو ولايتونو کې د دې وزارت د کارکوونکو وړتياوې هم لوړې شي .
وزير زياته کړه ، چې ورته پروژې تر دې وړاندې هم په کابل او باميانو ولايتونو کې پلې شوې دي ، خو داځل به يې ډيرې پروژې په کاپيسا او لږ به يې په کابل او باميانو کې وي .
خو ده په دې اړه هم نور جزيئات ورنکړل .
د خوړو نړيوال سازمان مشر عثمان ګويندو وويل ، چې د جاپان په ياده مرسته د جوړېدونکو پروژو په بشپړېدو سره به په يادو ولايتونو کې ٢١ زره هکتاره ځمکه تر اوبو لاندې او د کرنيزو حاصلاتو کچه هم لوړه شي .
هغه زياته کړه ، چې په دې پروژو کې به شاوخوا ٧٠ زرو تنو ته د کار زمينه برابره شي .
د ماليې وزارت د معلوماتو له مخې، جاپان په تېرو شاوخوا ١١ کلونو کې له افغانستان سره ٣ميليارده امريکايي ډالره مرسته کړې ده .
