په لغمان کې د پروژو چارې پيل شوې

 مهترلام (پژواک،٢٧وږى٩٢):په لغمان کې د ٩٠ ميليونه افغانيو په لګښت د بېلابېلو   پروژو   چارې پيل شوې.

 دلغمان ولايت له مطبوعاتي دفترڅخه د وږي په ٢٧مه پژواک خبري اژانس ته په راليږل شوې خبرپاڼه کې ويل شوي، چې ددغو پروژو چارې نن د لغمان والي فضل الله مجددي له خوا پيل شوې.

 خبرپاڼه زياتوي، له دغو پروژو څخه په یوه پروژه ، چې ۵۶ میلیونه افغانۍ لګښت پرې راځي ، په مهترلام ښار کې د یوه مارکېټ جوړول دي، چې   ۷۲ دوکانونه به ولري .

  د سرچينې په وينا، بله پروژه په مهترلام ښار کې د دوه سړکه جوړېدل دي ، شاوخوا ۳۴ میلیونه افغانۍ  لګښت پرې راځي ، چې  د ښاروالۍ له خوا ورکول کيږي او په شپږو مياشتو کې به يې چارې بشپړې شي.

 خبرپاڼې زياته کړې ، چې دغه دوه سړکونه ۱۶۰۰ متره اوږدوالی، ۱۳ متره پراخوالی او دواړو خواوو ته يې  د ۳ مترو په اندازه پلې لارې  جوړيږي .