ترينکوټ ( پژواک ١٤ تله ٩٢) : د اروزګان د هوايي ډګر سړک د يولړ مراسمو په ترڅ کې ګټې اخيستنې ته وسپارل شو.
د سړک پرانيستنې پر مهال د تلې په ١٤مه، د اروزګان والي امير محمد اخندزاده وويل، سړک ۲،۵ کيلومتره اوږد او د پخيدو چارې يې په پنځو مياشتو کې بشپړه شوې دي.
د والي په وينا، د سړک په پخولو ٤٥ ميليونه افغانۍ لګښت راغلى، پيسې يې د نړيوال بانک مرسته وه او د سړک د پخېدو چارې د فوايد عامې وزارت له لوري بشپړې شوې.
د اروزګان والي د دې سړک پخيدل ډير اړين وبلل او زياته يې کړه، د سلګونو مسافرو تر څنګ به د سيمې د ډيرى خلکو ټرانسپورټي ستونزې راکمې کړي.
د ترينکوټ اوسيدونکي هم د دې سړک د پخيدو هر کلى کوي او زياتوي، چې دوى ته به ډيرې اسانتياوې رامنځته کړي .
د سيمې اوسېدونکي سيف الله پژواک ته وويل، د هوايي ډګر سړک پخوا خام و، چې له امله يې خلک له ستونزو سره مخ و.
نوموړى زياتوي، په دې خوشاله دى، چې د کور مخ ته يې پوخ سړک جوړ شو.
د سيمې اوسيدونکی او د سړک يو تن کارګر سميع الله وايي، له يوې خوا ورته د کار زمينه برابره شوه او له بل لوري د سړک په پخيدو خلکو ته اسانتياوې رامنځ ته شوې.
اوسمهال په اروزګان کې د سړک پخولو څو نورې پروژې هم تر کار لاندې دي.
