مزارشريف ( پژواک ٢١ ليندۍ ٩٢ ) : د بلخ ولايت د فاطمه بلخي د نجونو ښوونځی د انګلستان له خوا د نړۍ له غوره ښوونځيو څخه وګڼل شو.
د بلخ ولايت د پوهنې رييس قيس مهراين د ليندۍ په ۲۱مه، پژواک خبري اژانس ته وويل، چې د بلخ شل ښوونځي په انلاين توګه د برټش کونسل له لارې د انګلستان له غوره ښوونځيو سره په اړيکه کې وو، چې وخت ناوخته يې د دغه ښوونځيو طرحې او پلانونه ارزيابي کول.
نوموړي زياته کړه، چې د انګلستان د برټش کونسل له لارې په شوې سروې کې د بلخ ولايت په مزارشريف ښار کې د فاطمه بلخي په نامه د نجونو ښوونځی د نړۍ په غوره ښوونځيو کې شامل کړای شو.
د هغه په وينا،د فاطمه بلخي ښوونځی د سرسبزي، ودانۍ،د درسي موادو، لابراتوار، کتابتون، د تدريس طرحې او د ښوونځي د ادارې د زده کونکو له کورنيو سره د اړيکو له امله دغه مقام ته رسېدلی دی.
همداراز د زده کوونکو، ښوونکو او زده کوونکو د کورنيو تر منځ همغږۍ هم ددغه ښوونځي يو له مهمو کړنو څخه وې.
د مهراين په وينا، له همدې امله د انګلستان هېواد له خوا د دغه ښوونځي زده کوونکو ته سرو زرو مډال ورکړل شو.
هغه زياته کړه: ((موږ هڅه کوو، چې په روانو کلونو کې به د بلخ ولايت نور ښوونځي هم دغو سياليو ته وړاندې کوو، چې په بلخ ولايت کې د نړۍ په کچه د غوره ښوونځيو شمېر پکې زيات شي.))
د فاطمه بلخي ښوونځي مديرې فوزيه نعمتي پژواک ته وويل، چې دوی له تېرو څو کلونو هڅه کوي، چې د تدريس د ټولو معياري اصولو له مخې زده کوونکي وروزي.
نوموړې زياته کړه، چې د دغه ښوونځي زده کوونکي د ښوونځي په پاک ساتلو او د لوبغالو په جوړولو کې په خپله علاقه برخه اخلي او همدا لامل دی، چې ښه ښوونځي ګڼل کېږي.
همداراز د تدريس لارې چارې او زده کوونکو څارنه هغه مسايل دی، چې دغه ښوونځی يې د نړۍ په کچه په غوره ښوونځيو کې شامل کړ.









