کابل (پژواک٢٢غبرګولى٩٣): پاکستان وايي، چې د افغانستان د ولسمشرۍ د دويم پړاو د ټاکنو د امنيت په موخه پر پوله کلک امنيتي تدابير نيسي.
دغه مطلب په هغې خبرپاڼه کې راغلى، چې د غبرګولي په ٢٢مه په کابل کې د پاکستان د سفارت له خوا پژواک خبري اژانس ته رالېږل شوې ده.
خبرپاڼه زياتوي، پاکستان په افغانستان کې له ديموکراتيکو او سوله ييزو ټاکنو څخه ملاتړ کوي.
سرچينه وايي، د وري په ١٦مه په ټاکنو کې پاکستان پر پوله کلک جدي امنيتي تدابير نيولي و او په دويم پړاو کې به هم د پخوا په څېر سخت امنيتي تدابير ونيسي.
خبرپاڼه زياتوي، پر پوله به د څارنې په موخه اضافي امنيتي ځواکونه وګوماري، سرحدي سيمو ته څېرمه به تالاشۍ ډېرې کړي او له نورو مرستندويو مېکانيزمونو څخه به کار واخلي.
د سرچينې په حواله، پاکستان په افغانستان کې په سوله ييزه توګه د واک د لېږد ملاتړ کوي او له افغانانو غواړي، چې په ټاکنو کې پراخ ګډون وکړي.
خبرپاڼه کاږي، په افغانستان کې د ټاکنو ترسره کېدل د ټاکنيزو کمېسيونونو په مشرۍ د افغانانو کار دى، دوى دروند مسووليت په غاړه لري او تمه ده، چې په بريا سره به يې ترسره کړي.
ټاکل شوې ده، چې د ولسمشرۍ د دويم پړاو ټاکنې د شنبې په ورځ د غبرګولي په ٢٤مه، ترسره شي.
Views: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن