اروزگان (پژواک ٢٣ وږى ٩٣): د اروزګان په ګېزاب ولسوالۍ کې د ملي اردو يوې چورلکې د تخنيکي عوارضو له امله ټکر کړى، چې په پايله کې يې يو تن وژل شوى او اته نور ټپيان دي.
د اروزګان د والي وياند دوست محمد ناياب د وږي په ٢٣مه پژواک خبري اژانس ته وويل، دا پېښه نن مازيګر په شاوخوا پنځو بجو د يادې ولسوالۍ د مرکز په هوايي ډګر کې رامنځ ته شوې ده.
ده زياته کړه، پېښه هغه مهال رامنځ ته شوه، کله چې چورلکې غوښتل، په هوايي ډګر کې کښېني، خو د تخنيکي عوارضو له امله له کنټروله وتلې او له دېوال سره يې ټکر کړى دى.
د هغه په وينا، په دې پېښه کې يو پيلوټ او شپږ د چټک غبرګون پوځيان ژوبل شوي دي.
خو په اروزګان کې د ملي اردو د څلورمې پلې لوا قوماندان جنرال محمد رسول کندهاري بيا پژواک ته وويل، چې په دې پېښه کې د چورلکې يو امنيتي کس وژل شوى، دوه پيلوټان او ٦ د چټک غبرګون قطعې سرتېري ټپيان شوي دي.
د ده په خبره، ټپيان مرکز ترينکوټ ته لېږدول شوي او روغتيايي حالت يې ښه دى.
هغه زياتوي، نن له مرکز ترينکوټ څخه ګيزاب ولسوالۍ ته د عملياتو په موخه درې چورلکې تللې وې، چې دوه يې رسېدلې او درېيمې چورلکه د کښېناستو پرمهال کنټرول له لاسه ورکړى او د ميدان له مخامخ دېوال سره لګېدلې، چې په ترڅ کې يې ياده مرګ ژوبله اوښتې ده.
