کابل ( پژواک، ٢ ليندۍ ٩٣ ) : د افغانستان د ښځو حقوقو په اړه نړيوال کنفرانس د ليندۍ په ٢مه، د ناروې په پلازمېنه اسلو کې پيل شو.
د ناروې د بهرنيو چارو وزارت له خوا د ليندۍ په ٢مه، په يوه خپره شوې خبرپاڼه کې راغلي ، چې دا کنفرانس يې د افغانستان او امريکا له حکومتونو او مدني ټولنو سره په همکارۍ او همغږۍ جوړ کړى ، چې نن په اسلو کې پيل شو.
سرچينې زياته کړې چې په دې کنفرانس کې د ولسمشر اشرف غني مېرمن رولا غني ( بي بي ګل) ، د ښځو چارو وزيره حسن بانو غضنفر، د ولسي جرګې وکيله ميرمن شينکي کړوخېل او فوزيه کوفي او د افغانستان د ښځو د ځينو ټولنو استازو برخه اخيستې ده.
مېرمن رولا غني او د ناروې لومړۍ وزيره ارنا سولبرېګ ددې کنفرانس له پرانيستونکو وينا والو څخه وې.
سرچينې زياته کړې ، له دې کنفرانس څخه موخه دا ده، چې د افغانستان ښځو ته دې چانس ورکړل شي، چې څنګه دوى کولى شي په دغه هېواد کې د ښځو د حقوقو په برخه کې پرمختګونه وکړي .
