کابل (پژواک، ١٠ ورى ٩٤): د طالبانو د واکمنۍ پخوانى وزير ملا اغاجان معتصم وايي، په افغانستان کې د سولې او امنيت د ټينګښت په موخه د سولې له هر ډول حرکت څخه ملاتړ کوي.
نوموړي پژواک خبري اژانس ته وويل چې د افغانستان حکومت او وسله وال طالبان دې له نسبي رامنځته شوي فرصت څخه ګټه واخلي او له يو بل سره دې خبرو ته کېني؛ ځکه چې جنګ د حل لاره نه ده.
دى د سولې له بهير څخه د ملاتړ څرګندولو تر څنګ وايي: “هېواد مو د اور په لمبو کې سوځېږي، بايد په ګډه د دغه اور وژلو ته مټې را بډ وهو.”
د هغه په وينا، پر هېواد مو اور بل او له بحراني حالت سره مخ دى، هېوادوال مو له ګڼو ننګونو او ستونزو سره لاس او ګرېوان دي؛ د دغو ټولو ناخوالو د له منځه وړو لپاره يواځېنى حل سوله ده.
معتصم زياتوي: “سوله زموږ اشد ضرورت او د سيمې لپاره حياتي اړتيا ده.”
ملا معتصم چې د طالبانو د واکمنۍ پر مهال د ماليې وزير او د طالبانو د سياسي کمېسيون پخوانى مشر و، اوسمهال له هېواده بهر ژوند کوي.
خو بايد وويل شي چې له څه مودې راپه دېخوا د افغانستان د حکومت او وسله والو طالبانو تر منځ د خبرو د پيلېدو هڅې روانې دي، خو تر اوسه پورې هېڅ يوه لوري دا خبرې نه دي تاييد کړې.
د دغو مذاکراتو د هڅو پيل وروسته له هغه زور واخيست چې د پاکستان د پوځ لوى درستيز او د استخباراتو د ادارې مشر له کابل څخه ليدنه وکړه.
Views: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن