<p>کابل(پژواک،١٩لړم٩٤): پخواني ولسمشر حامد کرزي په زابل کې د عامو کسانو سر پرېکونه د انساني حقونو ضد او ترهګريز عمل وباله.</p>
<p>دغه څرګندونې په هغه خبرپاڼه کې شوي چې د پخواني ولسمشر حامد کرزي له مطبوعاتي دفتر څخه پژواک خبري اژانس ته را لېږل شوې ده.</p>
<p>وړمه ورځ وسله والو کسانو په زابل ولايت کې د غزني ولايت د جاغوريو ولسوالۍ له اوو تنو اوسېدونکو سرونه پرې کړل.</p>
<p>په وژل شويو کې يوه ماشومه او درې ښځې هم شاملې وې چې تېره شپه يې جسدونه غزني ولايت ته راوړل شول.</p>
<p>د سرچيني په حواله، پخواني ولسمشر حامد کرزي ياده کړنه په کلکو ټکو غندلې او ويې ويل چې دا کار د بشري حقونو ضد او ترهګريز عمل دى.</p>
<p>کرزي دا هم ويلي : (( د افغانستان دښمنان دې په دې پوه شي چې هيڅ مهال د دغه شان کړنو په ترسره کولو نه شي کولى د افغانستان ثبات ته ضربه ورسوي.))</p>
<p>دا په داسې حال کې ده چې د ولسمشرۍ ماڼې په ګډون ځينو نورو بنسټونو هم ياده پېښه په کلکو ټکو غندلې ده.</p>
<p>د همدې پېښې په غبرګون کې نن په کابل او غزني کې سلګونو کسانو لاريون وکړ او ټاکل شوې چې وژل شوي کسان کابل ته راوړي.</p>
