منځپانګې ته تلل
دوشنبه ۱۶ نومبر ۲۰۲۶ · کابل ۹:۱۶ غ.م
۹° — په ټولو ولایتونو کې هوا
صاف · ↑۱۴° ↓۱°
د هوا کیفیت: منځنی
غړي

د افغانستان او هندوستان د کرکټ ادارو ترمنځ تړون لاسليک شو

· ۳ دقیقې لوستل · ۹۹ کتنې

کابل (پژواک، ١٩ ليندۍ ٩٤): د افغانستان او هندوستان د کرکټ ادارو تر منځ يو تړون لاسليک شو چې له مخې به يې تر دې وروسته افغانستان خپلې نړيوالې لوبې او تمرينات د دغه هېواد په لوبغالو کې ترسره کوي.

دا په داسې حال کې ده چې تر اوسه پورې د متحده اماراتو د شارجې کرکټ لوبغالى د افغانستان د کوربه لوبغالي په نوم او دلته يې خپلې لوبې ترسره کوي، خو په دې وروستيو کې افغان لوبغاړو ته د اماراتو د ويزو ستونزه پيدا شوې وه.

د افغانستان کرکټ بورډ وياند فريد هوتک د ليندۍ په ١٩مه پژواک خبري اژانس ته وويل چې نن د هند په پلازمېنه ډيلي کې د افغانستان او هندوستان کرکټ  ادارو د مسوولينو تر منځ يو تړون لاسليک شو.

هغه زياته کړه چې پر دغه تړون د افغانستان کرکټ بورډ اجرائيوي رييس شفيق ستانکزي او د هندوستان کرکټ ادارې (بي سي سي اى) سکرتر جنرال انوراګ ټاکو او د هندوستان کرکټ ليګ (اى پي اېل) مسوول راجيف شوکلا  تر منځ لاسليک شو.

هوتک وايي چې په دغو مراسمو کې د دواړو هېوادونو يو شمېر نورو مسوولينو برخه اخيستې وه.

د نوموړي په وينا، د دغه تړون له مخې د هندوستان کې په نويلي ډيلي کې د کرکټ يو نړيوال لوبغالى د افغانستان په واک کې ورکوي، تر څو خپلې بهرنۍ لوبې او تمرينات په کې ترسره کوي.

کرکټ بورډ وايي چې اوسمهال به په دغه لوبغالي کې د افغانستان او زمبابوې ملي نولس کلنو او الف لوبډلو تر منځ د کرکټ يوه ورځنۍ سيالۍ ترسره کوي.

ټاکل شوې د هند کرکټ بورډ اداره د افغانستان او زمبابوې ملي لوبډلو تر منځ سياليو لپاره بل لوبغالی هم په لنډمهاله توګه د کرکټ بورډ ادارې په واک کې ورکړي.
د افغانستان کرکټ بورډ اجرائيوي رييس شفيق الله ستانکزي وايي چې تر ډېرو هلو ځلو او خبرو اترو وروسته يې دغه نړيوال لوبغالی ترلاسه کړ.

هغه زياته کړه: ((په دغه نړيوال لوبغالي کې به د نړيوالو سياليو کوربه توب کوو.))

نوموړي د هندوستان کرکټ بورډ ادارې او د دوی له ژمنتيا او د ګريټر نويډا سپورتي کمپلکس له لېوالتيا او ملاتړ څخه يې هم د لوبغالي په ترلاسه کولو کې مننه وکړه.

د هندوستان د کرکټ بورډ سکرتر جنرال انوراګ ټاکور د افغانستان کرکټ په وده کې د خپلې ژمنتيا ډاډګيرنه ورکړه او ويې ويل چې په هند کې د افغان ملي لوبډلې د تمريناتي کمپونو او سياليو پر مهال به د دغه هېواد پياوړي لوبغاړي لکه سچن ټنډولکر، راهول ډراوېډ او وينکاټا لکشمن له لوبغاړو سره په روزنه کې هم مرستې وکړي.

 ټاکور زياته کړه چې دوی به له افغانستان سره د کرکټ نړيوالې شورا بشپړ غړيتوب ترلاسه کولو په برخه کې هم همکاري وکړي.

د يادونې ده، د ګريټرنويډا نړيوال کرکټ لوبغالی په ۲۰۱۴ زېږديز کال کې جوړ او د شاوخوا ۴۰۰۰۰ زره کسانو د ناستې لپاره ځای هم لري.

غړي

You need to subscribe to view the full article. Please login or register a new account.

اړوند خبرونه

ټول لوبې