جلال اباد (پژواک، ٤ غبرګولى ٩٦) : د ليکوال او ژورنالېست محمد اصف شنيواري د چاپ شوو ژورنالستيکو اثارو په پار ددرناوي غونډه جوړه شوه.
په دغه غونډه کې چې د ټولنيز پرمختيايي يون لخوا جوړه شوې وه، د ننګرهار پوهنتون رييس استاد ببرک مياخېل، د ملي شورا غړو، ځايي چارواکو، ليکوالانو، ژورنالستانو او مينه والو برخه اخيستې وه.
د اصف شينواري لخوا اته ژورنالستيکي اثار چې پکې ( خبر، خبر ليکنې آرونه، رسينو ته ليډ ليکنه، مرکه، په پښتو کې د کار الفبا، مسلکي ورځپاڼه ليکنه، د مرکې آرونه او رسنيو ته سوژه موندنه ) شامل دي، چاپ شوي دي.
د ټولنيز پرمختيايي يون رييس برهان الدين سيرت وويل، چې اصف شينوارى خپل مسلک ته ژمن ژورنالېست دى او تل يې د ټولنې حقايق رابرڅېره کړي دي.
د غونډې ګډونوالو د اصف شينواري لخوا لخوا د چاپ شويو اثارو ستاينه وکړه او هغه يې د ځوان کهول او په ځانګړې توګه د ژورنالېزم محصلينو لپاره ګټور وباله.
د ننګرهار پوهنتون ريي ببرک مياخیې بيا شینواری د ټولنيزو ښېګڼو لاروی ياد کړ او دده چاپ شوي اثار يې د ژورنالېزم په برخه کې بنسټيز اثار وبلل.
خبريال ذبیح الله غازي اصف شينواری په هنري انداز د غونډې ګډونوالو ته ور معرفي کړ او هغه يې د ختيځو ولايتونو د ژورنالېستانو د روزونکي په توګه ياد کړ.
محمد اصف شينواري د يادې ټولنې مننه وکړه او ډاډ يې ورکړ، چې نور به هم د ژورنالېزم په برخه کې ګڼ اثار ټولنې ته وړاندې کړي.
نوموړي ژمنه وکړه، چې د خپل ژوند تر پايه پورې به د خپلې ټولنې خدمت کوي.
اصف شينواری له تېرو لسو کالو راهيسې له تهران غږ راډيو سره په افغانستان کې د خبريال په توګه کار کوي،چې په فارسي او پښتو دواړو ژبو راپورونه وړاندې کوي.
