واشنګټن (پژواک، ٢٨ ليندۍ ٩٦ ): د امريکا ولسمشر ډونالډ ټرمپ يو ځل بيا له پاکستان څخه وغوښتل چې د ترهګرو پر ضد جدي مبارزه وکړي او په ډاګه يې کړه چې امريکا خپلواکه افغانستان غواړي.
ولسمشر ټرمپ دغه څرګندونې د امريکا د ملي امنيت په اړه د خپلې تګلارې د اعلان پر مهال کړې دي.
هغه له پاکستانه غوښتي چې د هغو ترهګرو پر وړاندې جدي اقدامات وکړي، چې په دغه هېواد کې فعال دي.
د ټرمپ په وينا، که پاکستان وغواړي په دې برخه کې جدي مرستې کولى شي.
د امريکا ولسمشر ويلي، دوى به د سخت دريځۍ او ترهګرۍ پر ضد خپلې جګړې ته ادامه ورکوي او پر ټولنيزو رسنيو باندې جدي څارنه کوي.
ټرمپ زياته کړې:(( امريکا غواړي چې له پاکستان سره اوږدمهاله همکاري ولري، خو پاکستان بايد د ترهګرو پر وړاندې جدي اقدامات وکړي.))
هغه وايي، امريکا هر کال پاکستان ته د ترهګرو پر ضد د جګړو لپاره ډېرې پيسې ورکړې دي.
د امريکا ولسمشر ويلي، په عراق او سوريه کې يې داعش ډلې ته ماتې ورکړې او د نړۍ په هر ګوټ کې به يې تعقيبوي.
هغه زياته کړې، امريکا په سيمه کې د افغانستان ملګرې ده او ځواکمن افغانستان غواړي.
دى وايي: " موږ يو ځواکمن او خپلواک افغانستان غواړو او داسې پاکستان چې د افغانستان په ناامنۍ کې ښکېل نه وي".
ټرمپ د افغانستان او سيمې لپاره د تېر اګسټ ستراتيژي بريالۍ وبلله او ويې ويل، د دې ستراتيژۍ له مخې افغانستان کې مثبت بدلون راغلی دی.
login or register a new account.
