جلال اباد (پژواک ۲۶ مرغومی ۹۶): د ننګرهار په بهسودو ولسوالۍ کې د څه کم ٣٧ ميليونو افغانيو په لګښت د يوه نمونوي ښوونځي او د ليليې ودانۍ د بنسټ ډبره کېښودل شوه.
د ياد ښوونځي د جوړېدو چارې د مرغومي په ۲۶مه د بهسودو ولسوالۍ اړوند بحر اباد په سيمه کې د يو لړ مراسمو په ترڅ کې پيل شوې.
د ننګرهار مستوفي عبدالله رقيبي وويل، د ولسمشر په لارښوونه د ښار جوړونې وزارت د هېواد په څلورو زونونو کې نمونوي ښوونځي جوړوي.
نوموړي وويل، د ختيځ په کچه په ننګرهار کې دغه ښوونځي جوړيږي، چې د ليليې تر څنګ ګڼې اسانتياوې لري او د څلورو ولايتونو زده کوونکي به په کې زده کړې کوي.
د ننګرهار د ښار جوړونې رئیس انجنير عبدالقهار حيدري وويل، دغه نمونوي ښوونځي او ليليه د ولسمشر په حکم د ښار جوړونې وزارت د ۳۶ ميليونه اووه سوه پنځه زره افغانيو په لګښت په دوو پوړونو کې د يوه کال په موده کې جوړيږي.
د پوهنې سرپرست رئيس سيد عيسی سادات وويل، دغه ښوونځی ۲۴ درسي او ۴ اداري خونې او نور ملحقات لري، چې په جوړېدو سره به يې د ختيځ زون زرګونه زده کوونکي د زده کړو له سهولتونو څخه برخمن شي.
