کابل (پژواک، ٢٩ مرغومى٩٦): د افغانستان د اسلامي جمهورریت جمهوررئیس محمداشرف غني نن له غرمې مخکې د ځانګړو عملیاتو قول اردو او د یاد بنسټ د فعالیتونو د څرنګوالي لېدنه وکړه.
جمهور رئیس د ځانګړو عملیاتو قول اردو مقر کې د تشریفاتو قطعې له معاینې وروسته د یادې قول اردو د قوماندې مرکز ته ولاړ او هلته یې د پلان جوړولو څرنګوالی او د ځانګړو عملیاتو ترسره کول وارزول.
په پیل کې د ځانګړو عملیاتو قول اردو قومندان تورن جنرال بسم الله وزیري د هېواد امنیتي او دفاعي ځواکونو څخه د جمهوررئیس د ملاتړ د مننې ترڅنګ د هېواد په مرکز، شمال، لویدیځ، سویل او ختیځ کې د یادې قول اردو د روزنیزو پروګرامونو، تجهیز، اکمالاتو او د تیاریو د کچې په اړه مفصل راپور وړاندې کړ.
نوموړي پر دې په ټینګار چې ځانګړي قطعات باید د معیارونو مطابق پر ځانګړو موخو وکارول شي وویل، زموږ اساسي موخه داده چې له هغو پلانونو سره چې لرو یې، ټاکلې موخې ته چې د هېواد پر ټوله جغرافیه حاکمیت دی ورسېږو او وتوانېږو په هېواد کې د سترو زیربنایي پروژو تطبیق ته زمینه برابره کړو.
وروسته جمهوررئیس غني خبرې وکړې او د ملي دفاع وزارت او د ځانګړو عملیاتو قول اردو رهبري پلاوي د سالم مدیریت، رهبرۍ او تعهد څخه په مننې یې وویل، موږ نن دلته راغلي یوو چې د هېواد د امنیتي او دفاعي ځواکونو د شهیدانو روح ته د دعا او تاسې ته د ډاډګېرنې تر څنګ، ستاسې د بریالیتونو مبارکي درته ووایو.
هغه زیاته کړه، مبارکي د دې لپاره درته وایم چې ستاسې پلانونه په چټکۍ سره د عملي کېدو په حال کې دي او کمانډو ځواکونو څخه د سالمې او معیاري استفادې لپاره د نوي دستور العمل مننه کوم.
جمهوررئیس پر دې په ټینګار چې له کمانډو ځواکونو څخه سمه استفاده وشي، وویل: د جنګ بدلون ته په کتو چې چټکو عملیاتو ته اړتیا لري، کمانډو ځواک ډېرچټک عمل کوي.
محمداشرف غني وویل، ملي دفاع وزارت د جګړې د تغییر فورمول پیدا کړی او سږ کال زموږ د ځواکونو تلفات کم شوي او په راتلونکي کې باید د تلفاتو شمېر نور هم راټیټ شي.
هغه زیاته کړه ۱۳۹۷ کال باید په هېواد کې د سراسري حاکمیت لپاره د عمل د ابتکار کال وي او هغه ولسوالۍ چې د دښمن په دوامداره مرکز بدلې شوي، باید هدف وګرځول شي او دښمن ته د تلپاتې پایګاه جوړولو فرصت برابر نشي.
جمهوررئیس د هېواد زیربنایي پروژو ته د کمانډو ځواکونو د پاملرنې مننه وکړه وې ویل، د افغانستان موقعیت باید په ستره پانګه بدل شي او ټاپې، مزارشریف –هرات د اوسپنې پټلۍ او تر کار لاندې د اوبو بندونه مهمې او حیاتي پروژې دي.
وروسته جمهوررئیس په هغو مراسمو کې چې د ځانګړو عملیاتو قول اردو یو شمېر سرتېرو په کې حضور درلود، ګډون وکړ.
په دې مراسمو کې د ملي دفاع وزیر ډګر جنرال طارق شاه بهرامي خبرې وکړې، د جمهوررئیس او د وسلوال پوځ د اعلی سرقومندان له پاملرنې او ملاتړ یې مننه وکړه وې ویل، د دښمن پلانونه مو شنډ کړي او د جنګ لوري ته مو تغییر ورکړی دی. هغه زیاته کړه په دې جنګ کې کمانډو اساسي رول لوبوي او ټول امنیتي او دفاعي ځواکونه د هېواد د ځمکنۍ بشپړتیا دفاع ته ژمن دي.
جمهوررئیس غني په دې مراسمو کې وویل: دا چې د چکړې په هېڅ میدان کې مو شاتګ نه دی کړی او تل مو دښمن ځپلی او خپل پلانونه مو عملي کړي، مننه کوم.
هغه زیاته کړه، د افغانستان او سویلي اسیا لپاره د امریکا متحدو ایالتونو د نوې ستراتېژۍ د اعلان دلیل د افغانستان د حکومت د فعالې ډیپلوماسۍ ترڅنګ د ځانګړو عملیاتو قطعاتو او د هېواد د ټولو امنیتي او دفاعي ځواکونو مېړانه ده او ستاسې د بریالیتوب له امله افغانستان په ښه وضعیت کې قرار لري.
جمهوررئیس غني دېته په اشارې چې د هېواد د امنیتي او دفاعي ځواکونو د هر منسوب په شهادت سره خپل یو لاس له لاسه ورکوو، وویل: زما لارښوونه داده چې د شهیدانو کورنیو ته دې ځانګړې پاملرنه وشي.
هغه د ځانګړو قطعاتو په ځانګړي ډول د ننګرهار په اچین او کندز ولایت کې د هغوی د عملیاتو مننه وکړه وې ویل، د ځانګړو عملیاتو قول اردو ځواکونو د لا ډېرې پیاوړتیاپه خاطر ټول لازم ترتیبات نيول شوي او په څو نورو اوونیو کې به د هوایي ځواکونو د پیاوړتیا لپاره هم ځانکړي ترتیبات ونیول شي.
جمهوررئیس غني پر دې په ټینګار چې د کمانډو له نوم سره په دښمن لړزه راځي وویل، موږ ټول د افغانستان د اساسي قانون په اساس چلند کوو، زموږ امنیتي او دفاعي ځواکونه ملي یووالي ته ژمن، د ملي یووالي تمثیلوونکي او د قانون پلي کوونکي دي، کوچني سیاستونه زموږ په امنیتي او دفاعي قواوو کې ځای نه لري.
د مراسمو په پای کې تورن جنرال بسم الله وزیري خبرې وکړې او د جمهوررئیس له حضور څخه یې د مننې په څرګندولو وویل، د ځانګړو عملیاتو قول اردو منسوبین د خپل هېواد او خلکو څخه د دفاع لپاره لازم چمتووالی لري.
غړيYou need to subscribe to view the full article. Please login or register a new account.
