کابل (پژواک، ١٤ تله ٩٧): د کرکټ افغان غوره ليګ سيالۍ د پکتيا پر وړاندې د کابل لوبډلې په بريا سره پيل شوې.
د افغانستان غوره لیګ د پرانيستې مراسم پرون له ماښام وروسته د متحده عربي اماراتو په شارجې نړيوال لوبغالي کې پيل شول.
په دغو مراسمو کې د افغانستان کرکـټ بورډ مشران، د مشرانو جرګې رييس فضل هادي مسلميار، د اماراتو کرکټ ادارې مشران او د افغانستان غوره ليګ مسوولينو برخه اخيستې وه.
د مراسمو په پيل کې د هرې لوبډلې لوبغاړي ميدان ته راغلل او بيا د کابل، ننګرهار، بلخ، پکتيا او کندهار لوبـډلو مشران سټېج ته ورغلل او لنډې مرکې يې وکړې.
د افغانستان کرکټ بورډ عمومي رييس عزيزالله فضلي د دغه ليګ پر پرانيستل کېدو د کرکټ ټولو مينه والو ته مبارکي ورکړه او ويې ويل چې دا د افغانانو يو خوب و چې نن رښتيا شو.
د هغه په وينا، نن افغانستان د نړۍ له هغو هېوادونو سره سيال شو چې د کرکټ مشهور لیګونه لري.
فضلي زياته کړه: ((دغه لیګ د افغانستان نوم روښانوي، زموږ ځوان لوبغاړي له مسلکي او تخنیکي اړخه روزي او سوداګرو ته وخت ورکوي چې خپل سوداګریز توکي له نړیوالو ټلویزونونو د کرکټ میلونونو مینوالو ته ور وپېژني.))
د پرانيستې تر مراسمو وروسته د کابل او پکتيا ترمنځ لومړۍ لوبه ترسره شوه، د کابل ځوانان لوبډلې پچه وګټله، خو پکتیا ته يې د توپوهنې بلنه ورکړه.
د پکتیا لوبډلې په ټاکل شوو ٢٠ اورونو کې د څلورو لوبغاړو په سوځېدو سره ٢١٧ منډې جوړې کړې او کابل ته يې د ٢١٨ منډو هدف ورکړ.
د پکتيا له لوري سکندر رضا ۷۸، شهزاد محمدي ۶۷، احسان الله جنت ٢٧ او دلپورت ۱۹ د پام وړ منډې جوړې کړې، د کابل له لوري ظاهر شهزاد ٢، فريد ملک او پرنل يو يو لوبغاړي وسوځول.
د کابل ځوانانو لوبـډلې ياد هدف د لوبې په وروستي شلم اوور کې د اوو لوبغاړو په سوځېدو ترلاسه کړ او بريا يې خپله کړه.
د کابل ځوانان توپ وهونکو له لوري ايونز ۷۳، حضرت الله ځاځي ۲۷، جاوېد احمدي ۲۵، راشدخان ۲۴، لوک رونکي ۱۵ او مسلم موسی ۱۷ منډې ترلاسه کړې.
نن به له غرمې وروسته د ننګرهار او کندهار او له ماښام وروسته به د کابل او بلخ ترمنځ لوبه ترسره شي.
غړيYou need to subscribe to view the full article. Please login or register a new account.










