مزارشريف (پژواک، ۲۹ وری ۹۸): د بلخ امنيه قوماندان سمونوال اجمل فايز وايي چې د ټولو هغو ډلو پر ضد به جدي اقدامات وکړي چې د بلخ امنيت ګواښي.
نوموړي د وري په ۲۹مه په مزارشريف کې د پوليسو د تېرې اوونۍ لاسته راوړنو په کنفرانس کې همدا راز وويل چې هېڅ څوک له قانونه لوړ نه دي.
د بلخ امنيه قوماندان وايي چې د تېرې اوونۍ په اوږدو کې يې د بېلابېلو جرمونو په تور ۲۵ کسان نيولي چې دمګړۍ تر عدلي او قضايي تعقيب لاندې دي.
د هغه په خبره، د تېرې يوې اوونۍ په اوږدو کې ۱۳ بېلابېل ډول وسله هم د پوليسو لاس ته ورغلې ده.
فايز د نيول شوو نشه يي توکو په اړه وويل چې ۵۶۳ کيلوګرامه شيشه، ۴۱۰ کيلوګرامه ترياک او هيرويين او ۱۲۱کيلوګرامه الکولي مشروبات هم په تېره اوونۍ د بلخ پوليسو له خوا نيول شوي دي.
د هغه په خبره، پوليس به د ټولو هغو ډلو پر ضد جدي اقدامات وکړي چې د بلخ د امنيت لپاره ګواښ جوړوي.
نوموړی وايي چې په دې برخه کې به د هېچا پروا ونه ساتي.
هغه وايي چې له خلکو سره يې په بلخ کې د امنيت راوستو ژمنه کړې او هڅه به يې دا وي چې خپله دغه ژمنه پوره کړي.
د امنيه قوماندان په وينا، لومړی به په مزارشريف ښار کې د وېره اچوونکو پر ضد عمليات ترسره کړي او له هغه وروسته به دغه لړۍ ولسواليو او لرو پرتو سيمو ته هم غځوي.
سمونوال فايز دا هم وويل چې د نا مسووله وسله والو د نيولو لپاره يې د نورو امنيتي ارګانونو په همغږۍ نوی ميکانيزم جوړ کړی چې د وري مياشتې له ۲۹مې يې د تطبيق چارې پيل شوې دي.
هغه وايي، هر هغه څوک يې دښمن دی چې د بلخ د امنيت لپاره ګواښ جوړوي.
نوموړی وايي چې تېره شپه يې د چمتال ولسوالۍ په مربوطاتو کې د عملياتو پر مهال شپږ طالبان وژلي او ۱۲ نور يې ټپيان کړي دي.
د بلخ امنيه قوماندان همدا راز وايي چې د مزار- شبرغان لويې لارې د امنيتي وضعيت ښه کېدو لپاره به ډېر ژر پوځي عمليات پيل شي.
د هغه په خبره، د دغو عملياتو په پايله کې به د لارې په اوږدو کې د امنيتي ځواکونو بېزونه او پوستې په اساسي ډول ورغول او تجهیز شي.
غړيYou need to subscribe to view the full article. Please login or register a new account.
