ترينکوټ (پژواک، ۲۰ لېندۍ ۹۸): د اروزګان ولایت په خاص اروزګان ولسوالۍ کې د ګوزڼ ناروغۍ د يوې نوې پېښې په ثبتېدو سره په روان کال کې په دغه ولايت کې د پېښو شمېر نهو ته ورسېد.
د دغه ولايت د عامې روغتیا رییس ډاکتر خان اغا میاخېل د لېندۍ په ٢٠مه پژواک اژانس ته وویل، ګوزڼ وهلی هلک اسرارالحق نومېږي، يو کال عمر لري او د خاص اروزګان ولسوالۍ اوسېدونکی دی.
میاخېل وايي، دې سيمې ته له تېرو څو کلونو راهیسې د نا امنۍ له امله د واکسین کمپاین نه دی تللی، نو له همدې امله په سیمه کې د پولیو مثبته پېښه ثبت شوې ده.
د هغه په وينا، له دې نوې پېښې سره په اروزګان کې د روان کال له پیل راهيسې ۹ مثبتې پېښې ثبت شوې دي.
د یاد ولايت د عامې روغتيا مسوولين وايي چې په اروزګان کې ٧٠ سلنه ماشومان د پوليو له واکسين څخه بې برخې پاتې کېږي.
طالپان په دغه ولايت کې کور په کور واکسين ته اجازه نه ورکوي.
