کابل (پژواک، ۳ لیندۍ ۹۸): د ټاکنیزو شکایتونو کمېسیون وايي چې د نن ورځې تر پايه د څلورو ټاکنيزو ټيمونو له خوا ٧٣٠٠ شکایتونه ثبت شوي دي.
دغه مطلب نن ماخوستن د شکايتونو کميسيون کمېشنر قطب الدين رويدار پژواک خبري اژانس ته په ډاګه کړ.
ده وويل، د نن ورځې تر پايه په کميسيون کې ٧٣٠٠ شکايتونه ثبت شوي چې د ثبات او همپالنې، دولت جوړوونکي، امنيت او عدالت، سولې او اسلامي عدالت ټاکنيزو ټيمونو له خوا شوي دي.
تردې مخکې د ټاکنیزو شکایتونو کمېسیون کمېشنر محمد قاسم الیاسي نن رسنیو ته ويلي و، نن تر ماسپښين یوې بجې ثبات او همپالنې ټېم له ۴۵۰۰ ډېر شکایتونه ثبت کړي دي.
هغه د دې په روښانولو چې ثبت شوي شکایتونو په ۱۶ ولایتونو کې دي، زیاته کړه، په هره دقیقه کې شپږ شکایتونه ثبتېږي او ښايي دغه شمېر د نن ورځې تر پایه لوړ شوي.
نوموړي زیاته کړه، ثبت شوي شکایتونه د څېړنو او رسېدنې لپاره اړوندو ولایتي دفترونو ته لېږل کېږي، په هغه صورت کې چې ټاکنیزو ټکټونه د ولایتي دفترونو تصمیم ونه مني او د استیناف غوښتنه وکړي، وروسته یې مرکزي دفتر شکایتونه له سره څېړي.
الیاسي دې ته په ځواب کې چې ثبت شوي شکایتونه د ولسمشرۍ ټاکنو په پایلو اغېز لري او که نه؟ وویل، په دې اړه هر ډول نظر به له وخت مخکې وي، خو هر ډول احتمال موجود دی.
هغه د ځینو نورو ټاکنیزو ډلو له خوا د شکایتونو د ثبت د فورم اخیستو خبر ورکړ او ویې ویل، ښايي تر سبا ځینې نورې ټاکنیزې ډلې هم خپل شکایتونه په رسمي ډول ثبت کړي.
د ثبات او همپالنې ټېم استازي جواد قادري د دې په روښانولو چې تېره ورځ یې ۴۰۶۳ شکایتونه ثبت کړي وویل، نن یې هم ۱۷۸۰ تازه شکایتونه راوړي چې د نوم لیکنې بهیر په عملي ډول روان دی.
هغه زیاته کړه، په ثبت شوو شکایتونو کې شکمنې، خیالي، غیربایومتریک، له ټاکنیز وخت بهر او ... رایې شاملې دي چې په دې اړه یې ټاکنیزو شکایتونو کمېسیون ته کافي اسناد وړاندې کړي دي.
نوموړي د دې په روښانولو چې یاد شمېر د تغییر وړ دی، زیاته کړه، نور شکایتونه هم شته او سبا به یې د ثبت لپاره د ټاکنیزو شکایتونو کمېسیون ته وسپاري.
هغه هیله مندي څرګنده کړه چې د ټاکنیزو شکایتونو کمېسیون به یې خپلې مخکينۍ ژمنې چې له ناپاکو رایو د پاکو رایو جلاکول دي، عملي کړي.
خو د دولت جوړوونکي ټيم څارونکي خالد سادات په خپله فيسبوک پاڼه کې لیکلي، د دولت ساز ټيم د شاوخوا ۵۰۰ محلونو رایې مرکزي سرور ته نه دي لېږدول شوې.
د ده په خبره، په هلمند کې د دولت ساز ټيم ۱۸ زره رایې نه دي شمېرل شوې او ځینې نور موارد هم شته چې په تړاو یې اسناد د بشپړېدو په حال کې دي او سبا به د شکایتونو د ثبت لپاره د ټاکنو خپلواک کمېسیون ته لېږل کېږي.
په ورته وخت کې د مشرانو جرګې یو شمېر غړو د ټاکنیزو شکایتونو له کمېسیون غواړي چې بې طرفه عمل وکړي او د معترضو نوماندانو شکایتونه د قوانینو او لوایحو په رڼا کې وڅېړي.
ټاکنو کمېسیون دوه ورځې مخکې د تېرو ولسمشرۍ ټاکنو لومړنۍ پایلې اعلان کړې چې په اساس یې محمد اشرف غني د ۵۰،۶۴ سلنه رایو په ترلاسه کولو له نورو نوماندانو مخکې و.
دغه راز د یادو پایلو له مخې د ولسمشرۍ ټاکنو بل نوماند ډاکتر عبدالله عبدالله له ۳۹ سلنه د ډېرو رایو په ترلاسه کولو په دویمه درجه کې ځای درلود.
خو د پایلو له اعلان وروسته ځینو ټاکنیزو ډلو پر لومړنیو پایلو نیوکه وکړه او ویې ویل، شکایتونه یې ثبتوي.
د ټاکنو د مهال وېش له مخې د ولسمشرۍ ټاکنو نوماندان کولای شي د لومړنیو پایلو له اعلان تر درېیو ورځو خپل شکایتونه د ټاکنیزو شکایتونو په کمېسیون کې ثبت کړي او د شکایتونو کمېسیون باید په ۱۵ ورځو کې ورته رسېدنه وکړي.
غړيYou need to subscribe to view the full article. Please login or register a new account.
