<p>کابل (پژواک، ۱۰ سلواغه ۹۸): د ټاکنیزو شکایتونو کمېسیون وایي چې نن د ورځې تر پایه په ۲۹ ولایتونو کې د استینافي اعتراضونو دسته بندي پای ته رسېږي، او تر راتلونکو دوو ورځو به یې څېړنه پیل شي.</p>
<p>د دغه کمېسیون استازې زرمینې حقجو کاکړ، نن پژواک خبري اژانس ته وویل چې د ډېری ولایتونو دسته بندي پای ته رسېدلې او د پاتې ولایتونو د استینافي اعتراضونو پر دسته بندي کار روان دی.</p>
<p>هغې دې ته په اشاره چې ښايي د نن ورځې تر پایه دسته بندي پای ومومي، زیاته کړه چې شنبې به یې څېړنه پیل او هڅه کېږي چې ډېر ژر یې په اړه پرېکړه وشي.</p>
<p>په تېرو ولسمشرۍ ټاکنو کې خلکو ۱۳ نوماندانو ته رایې ورکړې. د لومړنیو پایلو له مخې، محمد اشرف غني له پنځوس سلنه ډېرې او ورپسې عبدالله عبدالله څه باندې ۳۹ سلنه رایې لري.</p>
<p>ولسمشرۍ ټاکنې د روان کال د تلې په شپږمه ترسره شوې، لومړنۍ پایلې یې د مرغومي په لومړۍ نېټه اعلان شوې؛ خو وروستۍ پایلې یې تر اوسه نه دي اعلان شوې.</p>
<p>د دې پایلو له اعلان وروسته تر ۱۶ زرو زیات شکایتونه ثبت شول، خو د ټاکنیزو شکایتونو کمېسیون له دغو شکایتونو نږدې لس زره بې مورده بللي دي.</p>
<p>دغه کمېسیون د پاتې شکایتونو له مخې، تر سلو د ډېرو محلونو رایې باطلې کړې او وایي چې د څه باندې پنځه زره محلونو رایې باید بیا وشمېرل شي.</p>
<p>د ټاکنیزو شکایتونو کمېسیون نهه ورځې وړاندې په ۲۹ ولایتونو کې ۶۳۰۰ استینافي اعتراضونو ته د رسېدو بهیر پیل کړ او باید په ۱۵ ورځو کې یې بشپړ کړي.</p>
