مزارشريف (پژواک، ٢٤ کب ٩٨): د بلخ ولايت مقام وايي چې د ولسمشرۍ ماڼۍ د حکم پر اساس يې د نوروز ټول مراسم په بشپړ ډول لغوه کړي دي.
د بلخ ولايت مقام مرستيال محمد بشير توحيدي د کب په ٢٤مه په مزار شريف کې په يوه خبري کنفرانس کې رسنيو ته وويل چې د کرونا ويروس د خپرېدو له وېرې د ۱۳۹۹ کال نوروز مراسم په رسمي او بشپړ ډول لغوه شول.
هغه زياته کړه چې همدا راز د کب په ۲۴مه نېټه له ايران او هندوستان سره د مزارشريف پروازونه هم ځنډول شوي دي.
د توحيدي په خبره، بلخ ولايت مقام د مزارشريف ښار هوټلونو ته هم خبرداری ورکړی چې د خلکو له راټولېدو څخه مخنيوی وکړي.
بلخ کې دولتي او شخصي ښوونځي او پوهنتونونه هم لس ورځې وړاندې رخصت شوي وو چې بلخ ولايت مقام د مرستيال په وينا د يادو مراکزو رخصتي هم پر ځای پاتې.
د نوروز مراسم هر کال په مزارشريف ښار کې حضرت علي ته منسوب زيارت کې د جنډې په پورته کولو ترسره کېدل؛ خو سږ کال د کرونا ويروس د مخنيوي په موخه دغه جشن د بلخ په ګډون ټول هيواد کې لغوه شوی دی.
د افغانستان د ملي امنيت شورا هم څو ورځې مخکې په يوه ناسته کې د نوروز د نه نمانځلو پرېکړه کړې وه.
تر دې مخکې په فراه، هرات او نيمروز ولايتونو کې هم ټول ښوونځي تړل شوي دي.
د يادونې ده، د روغتيا نړيوال سازمان له خوا هم کرونا ناروغي يوه نړيواله وبا اعلان شوې ده چې تر اوسه په ١٢٢ هېوادونو کې خپره شوې ده.
په افغانستان کې هم تر اوسه د کرونا لس مثبتې پېښې ثبت شوې دي.
پاکستان پرون اعلان وکړ چې له افغانستان سره خپلې ټولې لارې بندوي، تر دې مخکې ازبکستان او تاجکستان هم ورته کارونه کړي دي.
د يادونې ده، د کرونا ويروس يا (کويډ ١٩) درې مياشتې مخکې د لومړي ځل لپاره په چين کې خپور شو او اوس د نړۍ ١٢٠ هېوادونو ته خپور شوی دی.
د روغتيا نړيوال سازمان د معلوماتو له مخې، تر اوسه له دې ناروغۍ په ټوله نړۍ کې شاوخوا پنځه زره کسان مړه شوي او ١٢٥زره نور کسان پرې اخته دي.
سرچينې زياته کړې چې يواځې په چين کې څه باندې درې زره کسان مړه او تر ٨٠زرو کسان پرې اخته شوي وو چې تر ٦٠زرو زيات کسان بېرته روغ شوي دي.
له چين وروسته په ايټاليا، ايران او سوېلي کوريا کې ډېر کسان پر دې ناروغۍ اخته شوي او تلفات يې هم ډېر لرل.
غړيYou need to subscribe to view the full article. Please login or register a new account.
