ژبه

ایا له پژواک سره د ګډون حساب نه لرئ؟

د ګډون لپاره کښېکاږئ.

ناجيه انوري: د سولې په خبرو کې تر يوې اندازې پرمختګ شوى

ناجيه انوري: د سولې په خبرو کې تر يوې اندازې پرمختګ شوى

author avatar
26 Nov 2020 - 18:27
ناجيه انوري: د سولې په خبرو کې تر يوې اندازې پرمختګ شوى
author avatar
26 Nov 2020 - 18:27

کابل (پژواک، ٦ليندۍ٩٩): د سولې په چارو کې دولت وزارت ويانده  وايي چې په دوحه کې د سولې په خبرو کې تر يوې اندازې پرمختګ شوى او د بشپړ حل لپاره کار جريان لري.

دغه څرګندونې د سولې په چارو کې ددولت وزارت وياندې ناجيه انوري نن د ليندۍ په ٦مه په خپلې ټويټرپاڼه کې کړې دي.

هغې ويلي چې د افغانستان د اسلامي جمهوريت مرکچي پلاوي په دوحه کې د سولې خبرو د مخته بيولو په برخه کې له هيڅ راز هلو ځلو دريغ نه دى کړى.

هغې زياته کړې چې د اختلافي موضوعاتو په اړه په دوامداره توګه له مقابل لوري(طالبانو) سره په بحث کې دي.

د نوموړې په خبره ، چې د سولې په خبرو کې تر يوې اندازې پرمختګ شوى او د بشپړ حل لپاره کار جريان لري چې له نهايي کېدو وروسته به ددولت او مقابل لوري ټوليز توافق رسما اعلان شي.

د سولې چارو وزارت ويانده دغه څرګندونې په داسې حال کې کوي چې تېره ورځ د ولسمشر وياند صديق صديقي په کابل کې د يوه خبري کنفرانس پرمهال ويلي و چې په دوحه کې د سولې په خبرو کې پرمختګ نه دی شوی؛ ځکه طالبان پر هغو مسایلو ټينګار کوي چې هغه د خلکو د غوښتنو خلاف دي او حکومت یې واک نه لري.

دا په داسې حال کې ده چې د لړم په ٢٩مه يوې باوري سرچينې پژواک ته ويلي و چې په قطر کې د افغانانو تر منځ د سولې په خبرو کې پرمختګ شوى او دواړو لوریو( دولت او طالبانو) د سولې خبرو پر طرزالعمل هوکړه کړې او ددولت د مرکچي پلاوي مشر معصوم ستانکزى له ولسمشرغني سره د مشورې په موخه کابل ته راغلى دى.

ځینو رسنیو دا هم ویلي چې ولسمشر محمد اشرف غني پر یاد طرزالعمل له هوکړې سره مخالفت کړی. خو د ولسمشر ویاند صدیق صدیقي په ياد کنفرانس کې وويل چې ولسمشر مخالفت نه دی کړی او د افغانستان حکومت تل د سولې پلوی دی.

صدیقي زياته کړه :«موږ د طالبانو پنځه زره بندیان د تاوتریخوالي د کمښت او د سولې خبرو د پرمختګ په موخه ازاد کړل، خو دواړه موخې نه دي عملي شوي.»

د ده په وینا، د سولې خبرو کې بندون نه دی مات شوی، ځکه طالبان پر هغو مسایلو ټينګار کوي چې هغه د خلکو د غوښتنو خلاف دي او حکومت یې واک نه لري.

له بلې خوا د بهرنیو چارو وزارت وزیر محمد حنیف اتمر تېره ورځ په کابل کې یوې خبري ناستې ته ویلي چې که طالبان د سولې برخه کې د افغان دولت په څېر روحیه او ژمنتیا ولري، نو دی ډاډه دی چې راتلونکو څو اوونیو کې به پرمختګ وشي.

د يادونې ده، شاوخوا دوه نيمې مياشتې مخکې د قطر په پلازمېنه دوحه کې د افغانستان د دولت او د طالبانو د مرکچي پلاوي ترمنځ رسماً د سولې خبرې پيل شوې، د خبرو د پیل په مراسمو کې د امريکا د بهرنيو چارو د وزير مايک پومپيو په ګډون د بهرنيو چارو وزيرانو او په قطر کې مېشتو سفيرانو برخه درلوده.

دغه راز په دغو مراسمو کې د ملي روغې جوړې عالي شورا مشر ډاکتر عبدالله او د بهرنيو چارو وزارت سرپرست وزير حنيف اتمر هم ګډون کړى و.

له يادو مراسمو وروسته د دولت او طالبانو د مرکچي پلاوو له غړو د تماس ډله وټاکل شوه او دې ډلې د سولې د خبرو په طرزالعمل باندې په عمومي او ګروپي ناستو کې خبرې پيل کړې.

د سولې خبرو د طرزالعمل په اړه هغه مهال اختلاف رامنځته شو چې طالبانو د سولې خبرو لپاره په دوحه د امریکا او طالبانو تړون د خبرو اصل (مبنا) باله خو د دولت مرکچي پلاوي ورسره مخالفت وکړ او د دغو خبرو د مخې ته بیولو لپاره یې د اصل په توګه نور وړاندیزونه لرل چې هغه بیا طالبانو نه منل.

دغه او پر ځینو نورو مسایلو اختلاف د دې لامل شو چې د طرزالعمل په اړه بحث څه باندې دوه میاشتو ته اوږد شو او وخت ناوخت به خبرې له ځنډ سره مخ کېدې او ناستې به پر خپل وخت نه ترسره کېدې.

Visits: 26

اړیکه ونیسئ

د کیسې وړاندیز وکړئ

پژواک ستاسو د خبر له وړانديزونو خوښ دی؛ مهرباني وکړئ، دلته په کلېک کولو سره له موږ سره خپل نظر شریک کړئ

د پژواک اپلیکېشن

د وروستي تازه معلوماتو ترلاسه کولو لپاره په خپل ګرځنده موبایل کې زموږ اپلېکشن ډاونلوډ کړئ.