جلال اباد (پژواک، ۱۸ لېندۍ ۹۹): د کليو پراختيا وزارت له لوري د هېواد په ۱۳۱ ولسواليو کې د ملي دسترخوان پروګرام له لارې پر اړمنو او کرونا ځپلو کورنيو د مرستو د وېش لړۍ پيل شوه.
د دغه وزارت د معلوماتو له مخې، د ملي دسترخوان په لومړي پړاو کې به يو اعشاريه دوه ميليونه کورنيو ته مرستې ورسول شي.
د کليو پراختيا سرپرست وزير مجيب الرحمن کريمي چې ننګرهار ته د دغه پروګرام د پرانېستې په موخه راغلی و د دې ولايت چپرهار ولسوالۍ کې يې خلکو ته د مرستو د وېش پرمهال دا څرګندونې وکړې.
هغه زياته کړه، د پروګرام پيل يې له ننګرهار او په ځانګړې توګه چپرهار څخه ځکه وکړ چې د دغې ولسوالۍ خلکو له وسله والو سره مبارزه کې ډېره قرباني ورکړې او له کرونا څخه هم د ټول هېواد د بې وزله وګړو په څېر ځپل شوي دي.
کريمي په همدې تړاو جوړې شوې غونډې ته وويل، د ټول هېواد په ۱۲زره او ۶۹۸ کليو کې به په يو اعشاريه اووه شپېته ميليونه کورنيو چې د ټول هېواد نوي سلنه کورنۍ کېږي د ۲۴۴ ميليونه ډالرو په لګښت خوراکي او غير خوراکي توکي ووېشي چې هرې کورنۍ ته به د ۴۰۰۰ افغانيو په اندازه مرسته ورسېږي.
هغه زياته کړه، د دې پروګرام موخه د ولسمشر په ځانګړې پاملرنه د کرونا ځپلو کورنيو لاسنيوی او مرستې ور رسول دي.
د ننګرهار والي ضياء الحق امرخېل هم د دغو مرستو پيل يو ګټور ګام ياد کړ او ډاډ يې ورکړ چې د دغه ولايت د ۲۲ ولسواليو په ټولو خلکو به په مساويانه ډول ووېشل شي.
د مرستو ترلاسه کوونکي په دې مرستو خوښ دي او غوښتنه کوي چې د مرستو د وېش دا پروسه دې دوامداره شي.
د چپرهار ولسوالۍ يوه قومي مشر محکم خان دولتزي وويل، که څه هم د څلور زره افغانيو مرسته د يوې کورنۍ د يوې مياشتې خرڅ هم نه دی خو وايي، د حکومت توان او د خلکو بې وزلۍ ته په کتو دا مرسته د يوې اړمنې کورنۍ لپاره ګټوره ده.
د چپرهار ولسوالۍ د شعيب کلي اوسېدونکی حبيب وايي، د مرستو نننى وېش ډېر شفاف دی او هيله يې څرګنده کړه چې په راتلونکي کې هم همدا ډول په روڼتيا کار ترسره شي.
ملي دسترخوان د ولسمشر محمد اشرف غني طرحه ده چې د نړيوال بانک په ۲۸۰ ميليونه ډالرو پلې کېږي چې دا طرحه په کور دننه له پراخو غبرګونونو سره مخ شوه.
Visits: 5
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن