مهترلام (پژواک، ١١ مرغومى ٩٩): د کابل- جلال اباد پر لويه لار د ترافيکي پېښې له امله درې کسان مړه شوي او شپږ نور ټپيان دي.
د لغمان د والي وياند عبيدالله دولتزي د مرغومي په ١٢مه پژواک خبري اژانس ته وويل چې پرون ماښام د کابل- جلال پر لويه لار د لغمان اړوند د عزيز خان کڅ په سيمه کې ترافيکي پېښه رامنځته شوې ده.
هغه زیاته کړه چې دغه پېښه د دوو کرولا موټرو د ټکر له امله رامنځته شوې او مرګ ژوبله هم لري.
د نوموړي په خبره چې په ياده پېښه کې درې کسان مړه شوي او شپږ نور ټپيان دي.
د دولتزي د معلوماتو له مخې، ټپيان د درملنې په موخه د ننګرهار ولايتي روغتون ته انتقال شوي دي.
د يادونې ده، ډېرى مهال دغه ډول پېښې د موټر چلوونکو بې احتياطۍ او يا هم د سړکونو خرابوالي له امله رامنځته کېږي.
Visits: 6
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن