مزارشريف (پژواک، ٢٣ مرغومى ٩٩): په مزارشريف ښار کې د شاهين قول اردو ښځينه کارکوونکو پر موټر وسله وال بريد شوى دی.
د بلخ امنيې قوماندانۍ مطبوعاتي مسوول عادل شاه عادل د مرغومي په ٢٣مه پژواک اژانس ته وويل چې دوو وسله والو موټرسايکل سپرو نن سهار اووه نيمې بجې د مزارښار پنځمې ناحيې په مربوطاتو کې د ملي اردو پر يوه موټر ډزې کړې دي.
هغه زياته کړه چې په دغه بريد کې د څلورو ښځو په ګډون پنځه کسان ټپيان شوي چې د قول اردو روغتون ته لېږدول شوي دي.
خو يوې بلې سرچينې چې د نوم له اخیستو يې ډډه کوله، پژواک ته وویل چې وسله والو پر هغه موټر برید کړی چې د شاهين قول اردو ښځې کارمندانې په کې سپرې وې.
د سرچينې په حواله، په دغه برید کې یو شمېر نظامي کارمندانو ته مرګ ژوبله هم اوښتې ده.
د شاهين قول اردو وياند حنيف رضايي د پېښې د تاييد ترڅنګ وايي چې په دغه بريد کې دوه ښځې وژل شوې او درې نورې ټپيان دي.
Visits: 98
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن