کابل (پژواک، ٢ مرغومی ٩٩): ولسمشر غني او ډاکتر عبدالله جوبایډن ته د جمهورې ریاست دورې د پیل مبارکي ورکړې او له نوموړي سره یې د ښې همکارۍ ژمنه وکړه.
جوبایډن د چهارشنبې په ورځ د لوړې مراسم پر ځای کړل او د امریکا متحده ایالتونو د شپږ څلوېښتم ولسمشر په توګه یې د دغه هېواد چارې په لاس کې واخیستې. له جوبایډن مخکې د هغه مرستیال کامالا هاریس لوړه وکړه. هغه د امریکا په تاریخ کې لومړۍ ښځه ده چې د ولسمشر مرستیالې په توګه لوړه کوي.
که څه هم د امریکا نوي ولسمشر له لوړې وروسته په خپله وینا کې د افغانستان په اړه څه ونه ویل، خو د افغان حکومت ځینو لویو چارواکو د جمهوري ریاست د دورې پیل یې هغه ته مبارکي ویلې ده.
ولسمشر محمد اشرف غنی پر خپله ټويټرپاڼه لیکلي چې افغانستان په دې سختو او کړکېچنو شرایطو کې د سولې او د ترهګرۍ له څو اړخیزې ستونزې سره د مبارزې لپاره د شراکت له بیا ځلې پیل سره له خپل بنیادي شریک د امریکا له متحده ایالتونو سره ترڅنګ درېږي.
دا په داسې حال کې ده چې ولسمشر غني پرون مازدیګر په ارګ کې د امریکا سفارت له شارژدافیر راس وېلسن سره هم لیدنه وکړه او له افغانستان سره د امریکا د نوي حکومت پر اړیکو یې خبرې ورسره وکړې.
د بایډن د لوړې له مراسمو یوه ورځ مخکې د امریکا بهرنیو چارو وزارت نوماند انتوني بلینکن ویلي وو چې واشنګتن به د امریکا او طالبانو ترمنځ د قطر تړون و ارزوي.
نوموړي سناتوران ته وویل، غواړي د دغه هوکړله لیک پر منځپانګه پوه شي او که دغه هوکړه لیک لاسته راوړنې خوندي نه کړي، کومه پایله به ونه لري.
په همدی حال کې د ملي روغې جوړې عالي شورا ريیس ډاکتر عبدالله عبدالله هم د امریکا ولسمشر او د هغه مرستیالې ته مبارکي ورکړې ده.
هغه خپله ټویټرپاڼه کې لیکلي، هیله لري له خپلو امریکایي دوستانو سره یو ځای سولې، ثبات، بشري حقونو او د ټولو لپاره سوکالۍ ته کار وکړي.
جوبایډن په داسې حال کې سپینې ماڼۍ ته ننوت چې په افغانستان کې د امریکايي ځواکونو د حضور شل کاله ووتل.
د امریکا دفاع وزارت په دې وروستیو کې اعلان کړی چې په افغانستان کې د امریکایي سرتېرو شمېر دوه نیم زرو کسانو ته را ښکته شوی دی.
تر اوسه نه ده معلومه چې د امریکا نوی ولسمشر بایډن به د قطر هوکړې له مخې په روان کال کې له افغانستانه خپل سرتېري بهر کړي که نه.
جوبایډن د امریکا دويم کاتولیک ولسمشر دی؛ مخکې له دې بېل کلینټن د ۱۹۹۰ په لسیزه کې د امریکا کاتولیک ولسمشر و.
Visits: 24
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن