جلال اباد (پژواک، ۱۸ وری ۱۴۰۰): د ننګرهار مرکز جلال اباد ښاروالۍ مسوولين وايي، د روژې په مناسبت د خوراکي توکو د نرخونو د کنټرول لپاره يې له سوداګرو سره سلا مشورې پيل کړې دي.
د چارواکو په خبره، هڅه کېږي چې سوداګر دې ته قانع کړي چې په روژه کې ځانګړي ارزانه پکېجونه برابر کړي.
د ښاروالۍ مسوولينو په وينا، هر کال د روژې په راتګ سره د خوراکي توکو نرخونه لوړېږي نو ځکه يې دا ځل د روژې له راتلو وړاندې د نرخونو کنټرول لپاره پر يوه نوې طرحه کار پيل کړی دی.
د جلال اباد ښاروالۍ مرستيال صديق الله جبارخېل د وري په ۱۸مه پژواک اژانس ته وويل چې تېره ورځ يې د جلال اباد ښار د خوراکي توکو پلورونکو اتحاديو او شرکتونو له مسوولينو او سوداګرو سره په همدې موخه ناسته کړې چې په روژه کې نرخونه کنټرول کړي.
دی وايي، سوداګر او د شرکتونو مسوولين وهڅول شول چې د روژې لپاره د خوراکي توکو ځانګړي پکېجونه برابر کړي چې نرخونه يې کم وي څو ټول هېوادوال په اسانۍ سره خوراکي توکي ترلاسه کړي.
دی وايي چې پّ تېرو کلونو کې د روژې په راتګ سره د خوراکي توکو بيې لوړېدې نو ځکه يې سږ کال د روژې له راتګ وړاندې د نرخونو کنټرولولو هڅې پيل کړې دي.
دی زياتوي، پر دغه پلان هم کار روان دی که په روژه کې د خوراکي توکو بيې لوړې شي نو له سرغړوونکو سره به قانوني چلند کېږي.
نوموړي له پژواک سره خبرو کې له دوکاندارانو او سوداګرو وغوښتل چې د روژې په مياشت کې نرخونه د لوړېدو پر ځای را ټيټ کړي؛ ځکه روژه د ترحم مياشت ده خو که چا سرغړونه وکړه نو دا ځل به ښاروالي اقدام کوي.
په ورته وخت کې د جلال اباد ښار د خوراکي توکو پلورونکو اتحاديې مشر بازمحمد ځوانمل هم پژواک ته وويل چې د ښاروالۍ په لارښوونه يې سوداګرو او خوراکي توکو شرکتونو او لويو پلورونکو سره خبرې اترې پيل کړې چې په روژه کې نرخونه کنټرول کړي.
دی وايي، په ځانګړې توګه د هغو توکو د نرخونو پر کنټرولولو او ټيټوالي کار کېږي چې د روژې مياشت کې يې استعمال زيات دی او ډاډ يې ورکړ چې ډېرو شرکتونو ورسره د نرخونو د کمښت ژمنه کړې ده.
د جلال اباد ښاريان بيا د چارواکو د دغو ژمنو د عمل غوښتنه کوي او وايي، هر کال همداسې ژمنې کېږي خو په روژه کې بيا نرخونه پر خپل سر لوړېږي.
مسافر خان چې د جلال اباد ښار د ډنډغاړې خوراکي توکو د خرڅلاو مارکېټ کې يې سودا اخيسته، پژواک ته وويل، چې تر اوسه روژې ته لا يوه اوونۍ پاتې ده خو دوکاندارانو نرخونه لوړ کړي دي.
مدني فعال او د نظر خاوند حيات الله حميدي وايي چې جلال اباد ښاروالۍ دې يوازې له شرکتونو او دوکاندارانو سره د خبرو له لارې کار مخې ته نه وړي، بلکې يوه ځانګړې نرخنامه دې جوړه کړي او سرغړوونکي دې جريمه کړي.
اټکل دی چې د را روانې سې په ورځ د روژې لومړۍ ورځ وي.
