کندهار (پژواک ۵ غویی ۱۴۰۰) کندهار په میوند ولسوالۍ کې د ماین چاودنې له امله د ۰۶ قطعې قوماندان وژل شوی او د ژیړۍ ولسوالۍ امنیه قوماندان ټپي شوی دی.
پېښه نن مازدیګر د دې ولسوالۍ په میراخور سیمه کې شوې ده.
یوې امنیتي سرچینې پژواک خبري اژانس ته وویل، د ۰۶ قطعې قوماندان عبدالوارث او د ژیړۍ ولسوالۍ امنیه قوماندان سمونیار بصیر اڅکزی د میوند ولسوالۍ په میراخور سیمه کې په عملیاتو بوخت و چې چاودنې پرې وشوه.
سرچینه زیاتوي، د چاودنې له امله د ۰۶ قطعې قوماندان وژل شوی او د ژیړۍ ولسوالۍ امنیه قوماندان ټپي شوی دی.
د سرچینې په خبره، سمونیار بصیر اڅکزی د سر او لاس په برخه کې ټپي شوی او روغتیايي حالت یې ښه دی.
وسله والو طالبانو تر اوسه په دې اړه څه نه دي ویلي.
د کندهار ژیړۍ، پنجوايي او میوند هغه ولسوالۍ دي چې جګړه په کې روانه ده او امنیتي ځواکونو د وسله والو خلاف عملیات پیل کړي دي.
Views: 52
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن