کندهار، جلال اباد، خوست (پژواک، ۲۹ غبرګولی ۱۴۰۰): ځایي چارواکي وایي چې په خوست، ننګرهار او کندهار ولایتونو کې د نښتو او عملیاتو پر مهال لسګونو وسله والو طالبانو او دولتي سرتېرو ته مرګ ژوبله اوښتې ده.
د ملي امنیت" صفر درې " قطعې ځانګړو ځواکونو د کندهار په ژېړۍ ولسوالۍ کې عملیات کړي چې په پایله کې یې ۳۳ وسله والو ته مرګ ژوبله اوښتې ده.
د ملي امنیت " صفر درې " قطعې یوې سرچینې د غبرګولي په۲۹مه، پژواک خبري اژانس ته وویل، ځانګړو ځواکونو د دغې ولسوالۍ د پاشمول، ترینانو او کلک په سیمو کې عملیات کړي دي.
سرچینه زیاتوي، په دغو عملیاتو کې له سپکو او درنو وسله والو کار اخیستل شوی چې په پایله کې یې ۲۴ وسله وال وژل شوي او ۹ نور ټپيان شوي دي.
سرچینه وايي، په دغو عملیاتو کې د وسله والو وسلې، مهمات او پټنځایونه هم ویجاړ شوی دي.
په دې عملیاتو کې ملکي وګړو او ځانګړو ځواکونو ته زیان نه دی اوښتی.
بل خوا د ملي اردو ځواکونو د کندهار په سپين بولدک، میوند او پنجوايي ولسوالیو کې د هوايي ځواک په ملاتړ عملیات کړي چې په پایله کې یې ۲۴ وسله وال وژل شوي او ۱۶ نور ټپيان شوي دي.
د ملي اردو د ۲۰۵ اتل قول اردو ویاند تورن صادق عیسی پژواک خبري اژانس ته وویل، دغه هوايي او ځمکني عملیات له نورو امنیتي ځواکونو سره په ګډه شوي دي.
هغه زیاته کړه، په دغو عملیاتو کې ۲۴ وسله وال وژل شوي او ۱۶ نور ټپیان شوي او دغه راز د وسله والو یوه اندازه وسلې او چاودېدونکي توکي هم له منځه وړل شوي دي.
بله خوا د کندهار په ډنډ ولسوالۍ کې وړمه شپه د پولیسو او وسله والو تر منځ جګړه شوې چې د امنیتي سرچینو په وینا، د دغې ولسوالۍ د امنیه قوماندان په ګډون ۱۲ پولیسو او ۲۳ وسله والو ته مرګ ژوبله اوښتې ده.
د دغې ولسوالۍ یوې باوري سرچینې پژواک ته وویل، جګړه د ډنډ او پنجوايي ولسوالیو تر منځ سیمه کې شوې ده.
سرچینه زیاتوي، په څو ساعته جګړه کې ۴ پولیس وژل شوي او د امنیه قوماندان نصرالله علیزي په ګډون ۸ تنه نور ټپیان شوي دي او دغه راز ۱۶ وسله وال وژل شوي او ۷ نور ټپيان شوي دي.
د یوه بل خبر له مخې، وسله والو طالبانو د ډنډ ولسوالۍ له قاسم پله سره د زابل د شاجوی ولسوالۍ امنیه قوماندان علي غوث وژلی دی.
د دغې ډلې ویاند قاري یوسف احمدي وايي، یاد شوی قوماندان یې په یوه چریکي برید کې وژلی دی.
دغه راز نن له غرمې مخکې د کندهار ښار د ۵مې امنیتي حوزې اړوند جمهوریت څلور لارې ته نږدې وسله والو یو کس په هدفي برید کې وژلی چې لا تر اوسه یې هویت معلوم نه دی.
بلخوا په خوست کې د وسله والو طالبانو په بريدونو کې ۱۳ امنيتي سرتېري وژل شوي او ۷ نور ټپيان دي.
دغې سرچينې چې نه يې غوښتل نوم يې په ډاګه شي پژواک خبري اژانس ته وويل، چې دغه بريدونه تېره شپه د یاد ولايت په موسی خېلو، باک او نادرشاه کوټ ولسواليو کې د امنيتي ځواکونو پر پوستو شوي دي.
دغې سرچينې وويل، چې موسی خېلو ولسوالۍ کې د ملي اردو پر يوه امنيتي پوسته وسله والو طالبانو برید کړی، چې له امله يې په پوسته کې شپږ سرتېري وژل شوي دي.
سرچينې زياته کړه، چې په ورته وخت کې وسله والو د باک ولسوالۍ د پوليسو پر چنارګي پوسته هم برید کړی، چې له امله يې ۷ پوليس وژل شوي او درې نور ټپيان دي.
سرچينې همدا ډول وويل، چې د دغه ولايت په نادرشاه کوټ ولسوالۍ کې هم د خواجه رحيم په نوم د پوليسو پر يوه پوسته بريد شوی، چې له امله يې ۴ پوليس ټپيان شوي دي.
د وسله والو طالبانو د دغو بريدونو په تړاو تراوسه د یاد ولايت د امنيتي ادارو مسوولينو څه نه دي ويلي. خو طالب وياند ذبيح الله مجاهد موسی خېلو ولسوالۍ کې د انتن په نوم د ملي اردو پر پوسته د برید مسوولیت منلی او ويلي يې دي، چې په دې برید کې يې د ملي اردو لس سرتېري وژلي او ۵ يې ژوندي نيولي دي.
بلخوا د ننګرهار سره رود ولسوالۍ کې تېره شپه د وسله والو طالبانو او امنيتي ځواکونو ترمنځ نښته شوې چې ۸ وسله وال طالبان او ۴ سرتېري په کې وژل شوي دي.
په دغو نښتو کې وسله والو طالبان د امنيتي سرتېرو د دوو پوستو د سقوط ادعا هم کوي، خو امنيتي مسوولينو يې د سقوط خبره رد کړې ده.
د ننګرهار د والي وياند عطاء الله خوږياڼي پژواک اژانس ته وويل، چې وسله والو طالبانو تېره شپه د سره رود ولسوالۍ شمشپور سیمه کې د غازي بابا پر پوستو باندې ډله ييز بريدونه کړي دي.
هغه زياته کړه چې وسله وال په يادو پوستو کې د مېشتو امنیتي ځواکونو له ځوابي برید سره مخ شوي چې په ترڅ کې ۸ وسله وال طالبان وژل شوي او ۴ نور ټپيان دي.
هغه ومنله چې په پېښه کې دوه امنيتي سرتېري هم وژل شوي دي.
خو يوې بلې سرچينې پژواک ته وويل چې په دغه نښته کې څلور سرتېري وژل شوي دي.
د سيمې يو قومي مشر ملک معشوق هم پژواک ته وويل چې دغه نښته کې څلور سرتېري وژل شوي دي.
بلخوا وسله والو طالبانو ادعا کړې چې شمشپور کې يې دوه پوستې سقوط کړې دي.
د دغې ډلې وياند ذبيح الله مجاهد پرخپله ټويټرپاڼه ليکلي چې په نښتو کې يې څلور پوليس وژلي او دوه نور ټپيان دي.
خو د ننګرهار د والي وياند دغه خبره رد کړه چې ګواکې پوستې دې سقوط شوې وي.
دغه راز د سيمې قومي مشر ملک معشوق هم وويل چې پوستې نه دي سقوط، خو سخته جګړه شوې ده.
