کابل (پژواک، ۱ چنګاښ ۱۴۰۰) : د ۲۱۷ پامیرقول اردو وایي چې په کندوز ښار کې یې یو شمېر هغه قومي مشران نیولي چې د پوستو د تسلیمۍ هڅه یې کوله.
د یادې قول اردو له خوا د چنګاښ په لومړۍ نېټه په یوه خپره شوې خبرپاڼه کې راغلي چې دا په اصل کې د طالبانو نفوذي کسان وو، چې د قومي مشرانو او سپین ږیرو په نوم ښار ته راغلي وو او هڅه یې کوله، چې د ښار اړونده د کله ګاو پوسته له نښتې پرته طالبانو ته تسلیم شي.
سرچینې زیاته کړې چې دغه کسان د امنیتي ځواکونو له خوا نیول شوي او پوښتنې ترې روانې دي.
قول اردو ویلي چې د ډېرو ولسوالیو په سقوط کې له همدې فورمول څخه کار اخیستل شوی دی.
بلخوا د کورنیو چارو وزارت ویلي، چې په دې وروستیو کې ځینو نفوذي کسانو په کلیو کې له طالبانو سره د امنیتي پوستو په تسلیمۍ کې مرسته کړې ده.
د دغه وزارت له خوا په یوه خپره شوې خبرپاڼه کې راغلي، تر اوسه د دغې قضیې په تړاو په نورستان، سرپل، فاریاب او بادغیس ولایتونو کې ګڼ شمېر کسان نیول شوي دي.
سرچینې زیاته کړې، د کورنیو چارو وزارت سرپرست وزیر جنرال عبدالستار میرزکوال د تازه پرېکړې پر بنسټ، هر هغه کس چې په دې ډول اقدام لاس پورې کړي، د امنیتي ځواکونو له لوري نیول کېږي او څارنوالۍ ته ور پېژندل کېږي.
په خبرپاڼه کې راغلي، د هېواد امنیتي او دفاعي ځواکونه د خلکو له همېشنۍ همکارۍ څخه مننه او قدرداني کوي او هېچا ته د امنیت د اخلال اجازه نه ورکوي.
