پوهنې وزارت: هغه ښوونځي چې په کرنتین کې یې خدمات نه دي وړاندې کړي، د فیس اخیستو مستحق نه کېږي

کابل (پژواک،۳ زمری ۱۴۰۰): ځيني خصوصي ښوونځي په داسې حال کې له زده کوونکو د غبرګولي او چنګاښ میاشتو فیسونه غواړي چې د کرنتین په دې دوره کې یې خدمات نه دي وړاندې کړي، خو پوهنې وزارت وايي چې یاد ښوونځي باید له زده کوونکو د دوو میاشتو فیس وانه خلي.

په هېواد کې د کرونا ویروس له بیا شدت وروسته په لوګر، غزني، هلمند، کندهار، لوګر، ننګرهار، پکتیا، پروان، وردګ، پنجشېر، بلخ، لغمان، بدخشان، کاپیسا، کندوز، نیمروز او کابل کې د غبرګولي له لسمې وروسته ښوونځي رخصت شول.

پوهنې وزارت د چنګاښ په ۳۱مه اعلان وکړ چې د ښوونځیو څلور نیم میاشتنۍ ازموینې دې په ګرمو ولایتونو کې د روغتیايي سپارښتونو او ټولنیو واټن په مراعاتولو سره د زمري په شپږمه پیل شي.

دغه راز یاد وزارت ویلي چې په سړو ولایتونو کې دې د زمري له دویمې تر پنځمې د «څلور نیم میاشتنیو ازموینو» لپاره تیاری ونیول شي او د زمري په شپږمه دې د روغتیايي سپارښتونو په مراعاتولو سره ازموینې ترسره شي.

په دولتي او خصوصي ښوونځیو کې د زمري له دویمې راهیسې د څلورنیم میاشتنیو ازموینو د ترسره کېدو لپاره تیاری روان دی، خو د کابل ښار ځیني اوسېدونکي چې اولادونه یې خصوصي ښوونځیو کې زده کړې کوي وايي چې خصوصي ښوونځي په داسې حال کې د غبرګولي او چنګاښ میاشتو د فیس د ورکړې غوښتنه کوي چې په دې میاشتو کې یې هېڅ ډول خدمات نه دي وړاندې کړي.

د کابل ښار اوسېدونکي عبدالباسط پژواک خبري اژانس ته وویل، وروڼه یې افغانیار خصوصي لېسه کې زده کړې کوي، یاد ښوونځي په داسې حال کې د غبرګولي او چنګاښ میاشتو د فیس غوښتنه کړې چې په دې موده کې هېڅ خدمات نه دي وړاندې کړي.

د کابل ښار بل اوسېدونکي جمشېد پوپل چې زوی او لور یې «د جهان په څلورم نمبر خصوصي عالي لېسه» کې پر زده کړو بوخت دي، هم وویل، دغه ښوونځي له زده کوونکو د غبرګولي او چنګاښ میاشتو د فیس غوښتنه کړې ده.

هغه وویل: «ښوونکو مې اولادونو ته ویلي چې که فیس ور نه کړي ازموینې نه ترې اخلي.))

د کابل ښار اوسېدونکې لطیفې بېکزاد چې دوه زامن او یوه لور یې په دنیا خصوصي لېسه کې زده کړې کوي وویل، دې لېسې هم په داسې حال کې له شاګردانو د غبرګولي او چنګاښ میاشتو د فیس غوښتنه کړې چې په دې میاشتو کې یې هیڅ خدمات نه دي وړاندې کړي.

دوی د پوهنې له وزارته غواړي چې د یادو خصوصي ښوونځيو د دغه کار مخنیوی وکړي.

خو د پوهنې وزارت ویاندې نجیبې ارین پژواک ته وویل، هغه خصوصي ښوونځي چې په یادو دوو میاشتو کې یې زده کوونکو ته خدمات نه دي وړاندې کړي، د فیس غوښتنې حق نه لري، که فیس وغواړي قانوني چلند به ورسره وشي.

هغې د خصوصي ښوونځیو د زده کوونکو له والدینو وغوښتل، د دوو ماشتو فیس لپاره د ښوونځيو لخوا د فشار راوړلو په صورت کې دې وزارت ته شکایت وکړي چې په دې اړه اقدام وشي.

خو هغه روښانه کړه، هغه ښوونځي چې یاده موده کې یې په انلاین توګه زده کوونکو ته تدریس کړی د فیس اخیستو حق لري.

ارین د یوې پوښتنې په ځواب کې وویل: ((تر اوسه د ښوونځیو د خلاصېدو او درسي چارو د پیلېدو په اړه هېڅ تصمیم نه دی نیول شوی، دغه تصمیم یوازې د ازموینو د ترسره کېدو لپاره نیول شوی، د ازموینو تر پای ته رسېدو وروسته ارزونه کېږي، که کرونا کمه شوې وه نو د درسونو د پیل په اړه تصمیم به هم ونیول شي.))

د عامې روغتیا وزارت د معلوماتو له مخې تر اوسه هېواد کې ۱۴۴ زره کسان پر کرونا اخته شوي، تر ۹۳ زره ډېر ترې بېرته روغ شوي او تر ۶۴۰۰ ډېرو کسانو یې له امله ساه ورکړې ده.